Zum Seiteninhalt

Integraziun fugitivas e fugitivs renconuschids e persunas admessas provisoricamain

En il chantun Grischun è vegnì deliberà da la regenza ils 20 da matg 2009 in concept per promover l'integraziun da fugitivas e da fugitivs renconuschids sco er da persunas admessas provisoricamain.

Quest concept metta las directivas per fixar e per finanziar emprimas mesiras en il rom dal process d'integraziun che ston vegnir iniziadas immediatamain suenter la renconuschientscha sco fugitiva u sco fugitiv u suenter l'admissiun provisorica. Ils princips ils pli impurtants da questa promoziun da l'integraziun ch'è specifica per la gruppa prendida en mira èn: 

  • Cumpetent per las emprimas mesiras en il process d'integraziun è l'incumbensada chantunala d'integraziun u l'incumbensà chantunal d'integraziun.
  • I vegnan messas a disposiziun mesiras per l'acquisiziun da la lingua e per l'integraziun sociala sco er mesiras en vista ad in'activitad da gudogn. Questas mesiras èn specificas per la gruppa prendida en mira e s'orienteschan al basegn. Il process da l'emprima integraziun vegn accumpagnà e controllà d'in post da coordinaziun ch'è l'instanza, ch'è responsabla per il cas e che decida, sco er d'ina assistenta u d'in assistent en la professiun.
  • Tut las persunas che han la vegliadetgna da pudair ir a lavurar han il dretg d'ina analisa individuala da la situaziun, d'in test da valitaziun linguistic sco er da mesiras che correspundan als basegns areguard l'acquisiziun da la lingua sco er areguard in'activitad da gudogn.

Las purschidas d'integraziun vegnan concepidas tenor il princip "promover e pretender" e duain – sche pussaivel – avair lieu entaifer las structuras regularas existentas, sco la scola, la furmaziun professiunala ed il martgà da lavur. Nua che las purschidas regularas n'adempleschan betg ils basegns specifics da la gruppa en mira, vegnan realisadas mesiras specificas. Las mesiras d'integraziun vegnan evaluadas regularmain dal post da coordinaziun, sch'ellas èn opportunas e sch'ellas adempleschan las finamiras, ed il success d'emprender vegn controllà regularmain en moda individuala.
 
Ulteriuras informaziuns pudais Vus consultar sin la pagina d'internet dal Post spezialisà per l’integraziun: www.integration.ch