Zum Seiteninhalt

Persunas che basegnan protecziun (permissiun S / art. 4 LAsil)

En general

La Svizra po dar ina protecziun provisorica a persunas che basegnan protecziun durant ina greva periclitaziun generala, oravant tut durant ina guerra u durant ina guerra civila sco er en situaziuns da violenza generala. Il cussegl federal decida, sche e tenor tge criteris ch'ina protecziun provisorica po vegnir dada a gruppas da persunas che basegnan protecziun. Persunas che basegnan protecziun sa trategnan en il chantun, al qual ellas èn vegnidas attribuidas.

Sch'il cussegl federal n'ha anc betg abolì la protecziun provisorica suenter 5 onns, survegnan las persunas che basegnan protecziun ina permissiun da dimora da quest chantun. La permissiun da dimora è limitada fin che la protecziun provisorica vegn abolida.  

Premissas

Durant ils emprims trais mais suenter l'entrada en Svizra na dastgan las persunas che basegnan protecziun betg surpigliar in'activitad da gudogn. Suenter permettan las autoritads chantunalas a las persunas che basegnan protecziun in'activitad da gudogn, premess ch'igl è avant maun ina dumonda d'ina patruna u d'in patrun e premess ch'i vegnan observadas las cundiziuns da salari e da lavur. 

Chaussas spezialas

Malgrà che la pussaivladad per conceder la protecziun provisorica è vegnida stgaffida gia en il rom da la revisiun da la lescha d'asil dals 26 da zercladur 1998, na l'han ins anc mai applitgada en questa furma.