Zum Seiteninhalt

Entrada en plazza / midada da plazza / midada da chantun tras burgaisas e tras burgais dal territori da la UE/AECL

Las permissiuns da dimora curta, da dimora e da domicil UE/AECL valan per l'entir territori da la Svizra (mobilitad geografica). Las burgaisas ed ils burgais dal territori da la UE/AECL na basegnan nagina nova permissiun, sch'ellas u sch'els transfereschan il center da lur vita en in auter chantun. Ellas ed els ston dentant s'annunziar tar la controlla d'abitantas e d'abitants cumpetenta dal nov lieu da domicil, perquai che lur nova adressa da domicil figurescha en la legitimaziun da persunas estras. Quai vala er tar ina midada d'adressa entaifer il medem chantun u entaifer la medema vischnanca. En cas d'ina midada d'adressa vegn emessa ina nova legitimaziun da persunas estras. Per quella sto vegnir pajada ina taxa.

La permissiun da dimora UE/AECL dat il dretg a la possessura u al possessur da la permissiun cun activitad da gudogn da midar la plazza e la professiun sco er da cumenzar in'activitad da gudogn independenta (mobilitad professiunala).

Patrunas u patruns ston annunziar la midada da plazza - per garantir l'imposiziun a la funtauna cumpletta da mintga occupaziun da burgaisas e da burgais dal territori da la UE/AECL - entaifer 8 dis a l'administraziun chantunala da taglia.

 

Entrada en plazza / midada da plazza / midada da chantun tras burgaisas e tras burgais da terzs stadis

 

Tut las entradas en plazza u midadas da plazza (cun excepziun da quellas da persunas domiciliadas) èn suttamessas a l'obligaziun da dumandar ina permissiun. I na dastga succeder nagina entrada en plazza u nagina midada da plazza avant ch'i saja vegnida concedida la permissiun da la polizia da persunas estras. En la legitimaziun da persunas estras figureschan tant la nova adressa da domicil sco er la patruna u il patrun.

Er la midada da chantun na dastga betg succeder senza il consentiment da la polizia da persunas estras. Fin tar la decisiun definitiva da la polizia da persunas estras sto la petenta u il petent mantegnair ses domicil en ses chantun da permissiun da fin ussa. La dumonda da midar plazza u d'entrar en plazza resp. da midar chantun sto vegnir fatga cun il formular "dumonda da permissiun per persunas estras (B1)", cun ina copia dal passaport e cun il contract da lavur actual sur la controlla d'abitantas e d'abitants dal futur lieu da domicil a la polizia da persunas estras.