Navigaziun principala

Cuntegn da la pagina

Permissiun da cunfinarias u da cunfinaris

En general

Tgi che vul pratitgar in'activitad da gudogn en Svizra sco cunfinaria u sco cunfinari, dovra ina permissiun da cunfinaria u da cunfinari. Permissiuns da cunfinaria u da cunfinari vegnan concedidas a persunas cun domicil en il territori da cunfin e n'èn betg contingentadas. A partir n'èn las zonas da cunfin betg pli decisivas per las burgaisas e per ils burgais dals stadis da la UE-25, q.v.d. che questas persunas estras pon lavurar en l'entira Svizra sco cunfinarias e sco cunfinaris. La dumonda sto vegnir inoltrada cun il formular "dumonda da permissiun per persunas estras (A1)" e cun il contract da lavur a la vischnanca, en la quala la patruna u il patrun ha ses domicil.

Persunas esters da terzs stadis survegnan ina permissiun da cunfinaria u da cunfinari mo en cas excepziunals.  

Zonas da cunfin

Sa basond sin la cunvegna tranter la Svizra e la Republica austriaca concernent il passadi da persunas en il pitschen traffic da cunfin valan las suandantas zonas da cunfin:

Chantun Grischun

Ils districts da la Plessur, dal Plaun, da la Landquart sura e sut, sco er l'Engiadina, la Val Müstair e la vischnanca da Samignun.

Republica austriaca

La regiun dal Vorarlberg ed il district politic da Puntina.

Sa basond sin il conclus federal che approvescha la cunvegna concludida tranter l'Italia e la Svizra s'extenda la zona dal cunfin mintgamai 10 km da questa vart e da l'autra vart dal cunfin naziunal.

Ella cumpiglia:

da la vart grischuna

20 km dal cunfin 

da la vart taliana

20 km al cunfin

Via da la procedura

La dumonda sto vegnir inoltrada cun il formular "dumonda da permissiun per persunas estras (A1)" a l'administraziun communala al lieu da domicil da la patruna u dal patrun resp. a la sedia dal domicil da la fatschenta. Suenter avair inoltrà la dumonda cumpletta po la petenta u il petent cumenzar la lavur. 

Cunfinari/as sco dimorant/as durant l'emna

Cunfinarias u cunfinaris na ston betg returnar mintga di en lur lieu da domicil a l'exteriur. Ellas u els pon eleger, sch'els vulan returnar mintga di u sch'els vulan star sco dimorantas u sco dimorants durant l'emna en Svizra. Cunfinarias u cunfinaris che returnan mo ina giada per emna en lur lieu da domicil a l'exteriur, ston annunziar quai a la controlla d'abitantas e d'abitants dal lieu da lavur e - sch'el n'è betg identic - al lieu da dimora durant l'emna. En la legitimaziun da persunas estras vegnan inscrits mo la patruna u il patrun e l'adressa da domicil a l'exteriur. L'adressa sco dimoranta u sco dimorant durant l'emna na vegn betg resguardada.

Prolungaziun da la permissin da cunfinari/a

La dumonda da prolungaziun sto vegnir inoltrada cun il formular "dumonda da permissiun per persunas estras (A1)" a la controlla d'abitantas e d'abitants al lieu da domicil da la patruna u dal patrun resp. a la sedia dal domicil da la fatschenta.

Permissiuns da cunfinarias e da cunfinaris cun relaziuns da lavur pli curtas ch'in onn vegnan emessas mo per la durada dal temp inditgà en la dumonda. Sche persunas da l'exteriur pon vegnir engaschadas durant l'entir onn, survegnan ellas - suenter avair preschentà ina conferma da la patruna u dal patrun - ina permissiun da cunfinarias u da cunfinaris per tschintg onns. Formulars da dumonda suttascrits da domaduas partidas vegnan acceptads sco confermas da la patruna u dal patrun.

Midada da plazza

Cunfinarias u cunfinaris che midan lur lieu da lavur, resp. lur patruna u lur patrun durant che la permissiun è valaivla, ston annunziar la midada a la controlla d'abitantas e d'abitants dal lieu dal domicil da la fatschenta da la nova patruna u dal nov patrun.