Cuntegn da la pagina

Legitimaziun da persunas estras en il format da carta da credit  

Suenter l'entrada en vigur da la cunvegna d'associaziun da Schengen ils 12 da december 2008 e per consequenza da l'ulteriur svilup da Schengen vegn la legitimaziun da persunas estras vertenta en format da carta da credit (LPE08) remplazzada ils 24 da schaner 2011 tras il nov document da legitimaziun biometric per persunas estras (LPE10). Sco datas biometricas vegnan registradas electronicamain la fatscha sco er duas improntas dals dets.

Tgi che dumonda in document da legitimaziun per persunas estras che derivan da terzs stadis sto - suenter avair inoltrà la dumonda tar la vischnanca da domicil - sa preschentar persunalmain al center da documents d'identitad cumpetent a Cuira u al center da documents d'identitad regiunal a Zernez per registrar las datas biometricas.


Inoltraziun da la dumonda
A partir dals 24 da schaner 2011 pon – per burgaisas e per burgais da terzs stadis – vegnir emess mo pli novs documents da legitimaziun per persunas estras (LPE10), e quai independentamain da la data, a la quala la dumonda è vegnida inoltrada. A partir dals 17 da schaner 2011 vegn la persuna estra infurmada - suenter l'elavuraziun da la dumonda - en scrit da noss post da servetsch davart il termin per la registraziun da las datas biometricas.

Il nov document da legitimaziun per persunas estras po vegnir dumandà sco fin ussa, cur ch'i vegn fatg la dumonda da prolungar la permissiun u da permetter in'emprima dimora. En quest connex sto dentant vegnir observà il suandant: 
  • Igl è stringentamain necessari da sa preschentar a la vischnanca da domicil ch'è responsabla en il chantun Grischun e da preschentar il passaport da la patria.
  • Er il document da legitimaziun biometric per persunas estras vegn producì centralmain da la firma Trüb SA, Aarau. La spediziun da las legitimaziuns vegn fatga directamain per posta recumandada a la vischnanca da domicil.
  • L'avis da la scadenza dal document da legitimaziun per persunas estras che derivan da terzs stadis e che disponan gia d'ina permissiun B u C è vegnì cumplettà cun la data da scadenza da las datas biometricas, cun il nr. SIMIC e cun il NAVS13.


Tgi survegn il nov document da legitimaziun per persunas estras?

Il nov document da legitimaziun per persunas estras survegnan burgaisas e burgais da pajais che na fan betg part da l'uniun europeica (UE) u da l'associaziun europeica da commerzi liber (AECL), pia uschenumnadas persunas da terzs stadis. Burgaisas e burgais da pajais da la UE e da la AECL sco er cunfinarias e cunfinaris na survegnan betg il nov document da legitimaziun per persunas estras. Per ellas e per els vegnan emessas las legitimaziuns da persunas estras en la furma vertenta. Er las legitimaziuns da requirentas e da requirents d'asil sco er da persunas estras admessas provisoricamain na sa midan betg.

Il nov document da legitimaziun per persunas estras dat – sco la legitimaziun da fin ussa – infurmaziuns davart il status da dimora tenor il dretg da persunas estras. El vegn emess per ils suandants tips da permissiun:

  • Permissiun da dimora curta (document da legitimaziun L) 
  • Permissiun da dimora (document da legitimaziun B) 
  • Permissiun da domicil (document da legitimaziun C)


Entrar en il territori da Schengen
Cun il nov document da legitimaziun per persunas estras e cun il passaport valaivel da la patria pon ins er viagiar senza visum supplementar en tut ils stadis ch'èn associads a Schengen. Legitimaziuns existentas da persunas estras da terzs stadis, ch'èn anc valaivlas il mument da l'entrada en vigur, autoriseschan questas persunas vinavant da viagiar senza visum en il territori da Schengen.

Las legitimaziuns existentas da persunas estras da terzs stadis restan valaivlas fin a lur data da scadenza. In nov document da legitimaziun per persunas estras vegn emess pir, cur che la legitimaziun existenta sto vegnir renovada perquai ch'ella scada. La legitimaziun existenta da persunas estras (LPE08) veglia ch'è anc valaivla na sto betg vegnir remplazzada tras il nov document da legitimaziun per persunas estras (LPE10).