Zum Seiteninhalt

Emissiun da las permissiuns da dimora

Proceduras per conceder ina permissiun da dimora a burgaisas ed a burgais dal territori da la UE/AECL

L'admissiun e la preschientscha da burgaisas e da burgais dal territori da la UE/AECL, da lur confamigliaras u lur confamigliars e da furnituras u da furniturs da servetschs vegnan regladas en l'ordinaziun davart l'introducziun da la libra circulaziun da persunas (OLCP) en cumbinaziun cun las disposiziuns da la cunvegna davart la libra circulaziun da persunas (CLC).

Per burgaisas u per burgais dal territori da la UE/AECL po vegnir fatga tant ina dumonda en Svizra sco er ina dumonda da l'exteriur.

L'avantatg d'ina dumonda en Svizra è che la petenta u ch'il petent dastga entrar en Svizra senza "garanzia d'ina permissiun da dimora".Ella u el dastga entrar en Svizra sco turista u sco turist ubain cun l'intent da dimora "en tschertga d'ina plazza".Sche la persuna estra finanziescha sezza sia dimora en Svizra, n'è ina dimora da main che trais mais betg suttamessa a l'obligaziun da dumandar ina permissiun.

Sche l'entrada succeda cun l'intent da cumenzar in'activitad da gudogn, sto la petenta u il petent s'annunziar – cun il formular da dumonda suttascrit da domaduas partidas e cun ina copia dal passaport u da la carta d'identitad – tar la vischnanca da domicil. Uschespert che la dumonda è vegnida deponida cumplettamain tar l'autoritad cumpetenta, po la persuna estra cumenzar la lavur. La polizia da persunas estras examinescha la dumonda ed emetta la permissiun dumandada, sch'i na dat nagins motivs da refusa da vart da la polizia da persunas estras.

En il cas d'ina dumonda da l'exteriur sto la patruna u il patrun inoltrar la dumonda directamain a la polizia da persunas estras. Sch'ina dumonda po vegnir acceptada, survegn la patruna u il patrun ina "garanzia d'ina permissiun da dimora", cun la quala la persuna estra po entrar en Svizra.

Suenter che l'entrada en Svizra è succedida sto la persuna estra emplenir in ulteriur formular da dumonda (A1) che sto vegnir visà da la controlla d'abitantas e d'abitants cumpetenta. Per l'annunzia a la controlla d'abitantas e d'abitants ston vegnir agiuntads il formular da dumonda, la garanzia originala ed ina copia dal passaport u da la carta d'identitad.

 

Dimoras senza activitad da gudogn per burgaisas e per burgais dal territori da la UE/AECL

Persunas che vulan prender domicil en Svizra permanentamain u transitoriamain senza in'activitad da gudogn, han il dretg d'ina permissiun da dimora, sch'ellas disponan da meds finanzials suffzients per sasezzas e per lur confamigliaras u per lur confamigliars. Ultra da quai ston ellas esser assicuradas suffizientamain cunter malsogna e cunter accident.

 

Permissiun da dimora per burgaisas e per burgais da terzs stadis

L'admissiun e la preschientscha da burgaisas e da burgais da terzs stadis (burgaisas e burgais da stadis che n'èn betg commembers da la UE/AECL) vegn reglada en l'ordinaziun davart la limitaziun dal dumber dals esters (OLE).

Permissiuns da dimora a burgaisas ed a burgais da terzs stadis vegnan concedidas mo en cas excepziunals, sch'i sa tracta da forzas da lavur qualifitgadas u sche motivs spezials giustifitgeschan in'excepziun. Dumondas da conceder permissiuns da dimora a burgaisas ed a burgais da terzs stadis ston vegnir motivadas pli detagliadamain; en spezial stoi vegnir mussà, tge ch'è la situaziun excepziunala.