Cuntegn da la pagina

Prescripziun d'annunzia

Prescripziuns d'entrada e d'annunzia per burgaisas e per burgais da la UE/AECL

Da princip valan vinavant las prescripziuns d'annunzia vertentas. Persunas estras ch'entran en Svizra senza "garanzia d'ina permissiun da dimora" per surpigliar in'activitad da gudogn, dastgan cumenzar lur plazza pir cur che l'uschenumnada dumonda naziunala è vegnida inoltrada - ensemen cun ina copia dal passaport u da la carta d'identitad - a la controlla d'abitantas e d'abitants cumpententa dal lieu da dimora. I n'è betg necessari che la patruna u ch'il patrun inoltreschia ordavant ina dumonda da conceder ina garanzia d'ina permissiun da dimora.

Persunas estras che possedan gia ina permissiun da dimora valaivla per l'activitad da gudogn (legitimaziun da persunas estras), ston annunziar ina midada da plazza mo pli tar la controlla d'abitantas e d'abitants (betg pli tar la polizia da persunas estras u tar l'uffizi da lavur).

Persunas estras ch'entran en Svizra en il rom d'ina furniziun da servetsch, dastgan cumenzar la lavur pir cur ch'ellas u ch'els possedan la permissiun da dimora.

Persunas ston s'annunziar entaifer 14 dis tar la controlla d'abitantas e d'abitants cumpetenta.

Il termin d'annunzia dad otg dis vala en general per tut las persunas estras ch'èn entradas en Svizra cun ina "garanzia d'ina permissiun da dimora". A chaschun da l'annunzia ston la garanzia ed ils formulars A1 ed A2 vegnir emplenids e suttascrits da domaduas partidas e vegnir inoltrads a la controlla d'abitantas e d'abitants.

Prescripziuns d'entrada e d'annunzia per burgaisas e burgais da terzs stadis

Per l'entrada en Svizra ston persunas estras posseder in passaport valaivel dal pajais d'origin; e las persunas obligadas da dumandar in visum ston ultra da quai posseder in visum d'entrada.

Persunas estras ch'èn vegnidas en Svizra per entrar en plazza e/u per restar permanentamain qua ston s'annunziar entaifer 14 dis cun il document d'entrada emess per ellas (garanzia d'ina permissiun da dimora) sco er cun il visum d'entrada, ch'è necessari per las persunas obligadas da dumandar in visum, tar la controlla d'abitantas e d'abitants cumpetenta da lur lieu da domicil. In'eventuala entrada en plazza na dastga betg succeder avant che avair fatg l'annunzia.