Cuntegn da la pagina

Dimora per tschertgar ina plazza

Nova entrada en Svizra

La dimora per tschertgar ina plazza da lavur è pussaivla maximalmain durant 6 mais. Per ina dimora per tschertgar ina plazza da lavur na dovran burgaisas e burgais dal territori da la UE/AECL nagina permissiun (dimora che na dovra nagina permissiun) durant ils emprims 3 mais. Per ulteriurs 3 mais po vegnir emessa – sin dumonda – ina permissiun per tschertgar ina plazza da lavur, sche avunda meds finanzials èn avant maun. Quests meds finanzials ston vegnir cumprovads cun inoltrar la dumonda.

Tschertga d'ina nova plazza da lavur suenter l'abandun d'ina activitad da gudogn

Suenter l'abandun d'ina activitad da gudogn en Svizra po la tschertga d'ina nova plazza da lavur vegnir permessa per maximalmain 6 mais. Er qua èn necessaris meds finanzials che tanschan durant tut la dimora per tschertgar ina plazza da lavur.

Tschertga d'ina nova plazza da lavur suenter l'abandun da l'activitad da gudogn ed a medem temp dretg d'ina diaria da dischoccupaziun

La tschertga d'ina nova plazza da lavur vegn permessa fin che las persunas dischoccupadas perdan lur dretg sin ina diaria, q.v.d. fin l'ultim di da la pussaivladad da retrair ina diaria da dischoccupaziun en Svizra.