Zum Seiteninhalt

Dumondas frequentas (FAQ)

  1. Sto vegnir fatga ina dumonda per midar plazza?
  2. Cura pon ins cumenzar la plazza?
  3. Fin tge vegliadetgna è pussaivel in arriv successiv da la famiglia?
  4. È pussaivla ina lavur a temp parzial?
  5. Vegn concedida ina permissiun da dimora permanenta per ina relaziun da lavur limitada sin dus onns er per tschintg onns?
  6. Co è reglada la protecziun tras l'assicuranza da persunas malsaunas, sch'ina dimoranta u sch'in dimorant a curt termin prenda cun sai sia famiglia?
  7. Èsi pussaivel per burgaisas e per burgais d'in stadi betg commember da la UE/AECL da survegnir ina permissiun da dimora?
  8. Per tge patrunas u per tge patruns po vegnir applitgada la procedura d'annunzia?
  9. Cura vegn resguardada la reglamentaziun dad 8 dis?

1. Sto vegnir fatga ina dumonda tar ina midada da plazza UE/AECL?
Na, i vala la mobilitad professiunala. Mo cunfinarias e cunfinaris ston far ina dumonda, perquai che la patruna u il patrun è visibel en la legitimaziun da persunas estras.  


2. Cura pon ins cumenzar la plazza?

Burgaisas e burgais da la UE/AECL dastgan gia suenter l'annunzia sin la vischnanca entschaiver la plazza. Ins na sto betg spetgar, fin ch'i vegn emess il document da legitimaziun. In'entrada en plazza avant l'annunzia a la vischnanca vegn persequitada penalmain.

Persunas estras ch'èn pertutgads da la procedura d'annunzia (preschientscha per l'activitad da gudogn pli pitschna che 90 dis per onn chalendar) pon cumenzar la plazza pir cur ch'ellas u ch'els èn annunziads tar il UCIML/SECO.

Sin la homepage dal SEM As stattan a disposiziun trais differents formulars d'annunzia.

Il formular d'annunzia po vegnir emplenì e tramess directamain al UCIML, Grabenstrasse 8, 7000 Cuira (fax 081 257 21 73). Ina conferma suttascritta da la patruna u dal patrun sto medemamain vegnir agiuntada.

Sche Vus vulais far diever pliras giadas per onn da la procedura d'annunzia, la pudais Vus far en la procedura online. Per quest intent è necessaria ina registraziun che Vus pudais medemamain far sin la homepage dal SEM.


3. Fin tge vegliadetgna è pussaivel in arriv successiv da la famiglia?
Tenor la cunvegna davart la libra circulaziun da persunas è pussaivel in arriv successiv da la famiglia da princip fin ad ina vegliadetgna da 21 onns. Ad uffants ed a parents en lingia directa (geniturs/tattas e tats) vegn dada ina permissiun en il rom da l'arriv successiv da la famiglia, sche lur mantegniment vegn u è vegnì concedì.


4. È pussaivla ina lavur a temp parzial?

Per conceder la permissiun n'è betg decisiva ina distincziun tranter lavur a temp parzial e lavur a temp cumplain. Decisiv èsi sulettamain ch'i vegnia cuntanschì il salari minimal usità al lieu ed en la branscha.


5. Vegn concedida ina permissiun da dimora permanenta UE/AECL per ina relaziun da lavur limitada sin dus onns er per tschintg onns?

Per ina relaziun da lavur pli curta ch'in onn vegn concedida ina permissiun da dimora curta per la durada da l'occupaziun previsa. Uschespert ch'igl è planisà ina relaziun da lavur pli lunga ch'in onn, vegn concedida automaticamain ina permissiun da dimora permanenta per tschintg onns.


6. Co è reglada la protecziun tras l'assicuranza da persunas malsaunas, sch'ina dimoranta u sch'in dimorant a curt termin prenda cun sai sia famiglia?

Tut las persunas èn suttamessas a l'obligaziun d'avair in'assicuranza da persunas malsaunas. L'Uffizi da migraziun a e da dretg civil dal Grischun n'ha naginas cumpetenzas en connex cun questa obligaziun d'avair in'assicuranza e n'è er betg en il cas da dar infurmaziuns. La cumpetenza ha la vischnanca da domicil en collavuraziun cun l'uffizi chantunal da sanadad.

Tut las dumondas en connex cun l'obligaziun d'avair in'assicuranza da persunas malsaunas da tut las categorias da dimora ston vegnir drizzadas a l'administraziun communala u a la controlla d'abitantas e d'abitants dal lieu da domicil.


7. Èsi pussaivel per burgaisas e per burgais d'in stadi betg commember da la UE/AECL da survegnir ina permissiun da dimora?
L'admissiun da burgaisas e da burgais d'in stadi betg commember da la UE/AECL è pussaivla mo en cas excepziunals. Permissiuns da dimora pon vegnir concedidas, sche la lavuranta u sch'il lavurant en dumonda è ina spezialista u in spezialist cumprovà che na po betg vegnir recrutà en il spazi da la UE/AECL. Infurmaziuns dat l'uffizi chantunal per industria, mastergn e lavur, tel. 081 257 23 47.


8. Per tge patrunas u per tge patruns po vegnir applitgada la procedura d'annunzia
?
Per burgaisas e per burgais dal territori da la UE/AECL cun in'acziun maximala da 90 dis da lavur resp. da 3 mais per onn chalendar sto vegnir fatga la procedura d'annunzia. Acziuns che duran pli ditg èn suttamessas er en il futur a l'obligaziun da dumandar ina permissiun.

L'annunzia po vegnir tramessa sin via electronica u cun ils formulars correspundents per posta u per fax a l'uffizi chantunal da lavur a Cuira. L'annunzia sto succeder almain 8 dis avant il cumenzament da la lavur.

La procedura d'annunzia po vegnir applitgada per lavurantas e per lavurants tramess en Svizra, per furnituras e per furniturs da servetschs sco er per persunas estras cun activitad da gudogn da curta durada tar ina patruna u tar in patrun svizzer.

Ni la polizia da persunas estras ni la controlla d'abitantas e d'abitants èn involvidas en la procedura d'annunzia. Dumondas davart la procedura d'annunzia ston vegnir fatgas exclusivamain a l'uffizi chantunal per industria, mastergn e lavur, cundiziuns da lavur, Grabenstrasse 8, 7000 Cuira.

Per la occupaziun da burgaisas e burghais dils novs stadis da la EU ei adina obligà d'avair ina permissiun La procedura d'annunzia na è betg pussaivla per dimorantas e dimorants a curt termin dals novs stadis UE/AECL.


9. Cura vegn resguardada la reglamentaziun dad 8 dis?

Per engaschaments da lavur da main che 8 dis n'è betg necessaria ina permissiun u l'obligaziun d'annunzia. En las branschas inditgadas qua sutvart na vala betg la reglamentaziun dad 8 dis; q.v.d. l'obligaziun d'annunzia u l'obligaziun da dumandar ina permissiun exista gia a partir da l'emprim di da l'activitad da gudogn:

Industria principala e secundara da construcziun / hotellaria / nettegiament en manaschis ed en chasadas / servetsch da surveglianza e da segirezza