L'integraziun sco cumplettaziun da las structuras regularas

L'integraziun da persunas estras duai vegnir realisada en emprima lingia sur las structuras regularas, sco en spezial la scola, la furmaziun professiunala, il mund professiunal, sco er sur las instituziuns da la segirezza sociala e dals fatgs da sanadad. Per cumplettar quai promova il chantun projects e mesiras specificas d'integraziun che faciliteschan a las persunas estras l'access a las purschidas da las structuras regularas.

Tenor il program d'accents Lingua e furmaziun sustegna il chantun – en il rom dals credits ch'al stattan a disposiziun – purschidas d'integraziun che permettan a persunas estras novarrivadas ed a talas che vivan gia en il chantun d'acceder sur il sectur bass a l'acquisiziun da la lingua locala, che dattan infurmaziuns pertutgant il mintgadi sco er che promovan la communicaziun tranter las persunas da lingua estra e la glieud indigena.

Sustegnids vegnan er projects d'integraziun en il sectur da la furmaziun dals geniturs, da la promoziun tempriva linguistica e sociala, da la convivenza, dal far punts, dal svilup dal quartier e da la lavur cun giuvenils. Il chantun sa participescha er vi da projects dal sectur d'integraziun ch'èn specificamain orientads a la regiun.

Per la participaziun finanziala dal chantun èsi impurtant ch'ils projects e che las mesiras d'integraziun s'orienteschan als basegns dal mund da mintgadi e che l'atgna cumpetenza da las persunas estras vegn rinforzada.