Cuntegn da la pagina

COVID Care – durant isolaziun e quarantina

Las persunas, ch’èn isoladas pervia da la malsogna COVID-19 u che ston star en quarantina suenter avair gì contact cun ina persuna malsauna, vegnan accumpagnads dal COVID Care Team da l’Uffizi da sanadad Grischun (sustegnì da persunal medicinal spezialisà e da la protecziun civila) u da lur media/medi da chasa. L’accumpagnament succeda telefonicamain u per app (COVID Care App).

Sustegn tar in’infecziun COVID-19

La malsogna COVID-19 è suttamessa a l’annunzia obligatorica. Laboratoris, medias e medis sco era ospitals infurmeschan perquai l’Uffizi da sanadad Grischun davart tut las persunas testadas positivas che vivan en il Grischun. L’Uffizi da sanadad Grischun surveglia ed accumpogna las pazientas ed ils pazients ch’èn isolads a chasa tenor la Lescha federala davart il cumbat cunter malsognas transmissiblas da l'uman (lescha d’epidemias) e tenor la Lescha da sanadad dal Grischun. Els vegnan perquai contactads regularmain per telefon e/u sustegnids entras l’app COVID Care. L’accumpagnament da las pazientas e dals pazients succeda entras lur media u lur medi da chasa (sche tal/tala è avant maun). Uschiglio vegn l’accumpagnament surprendì dal COVID Care Team da l’Uffizi da sanadad Grischun.

Sustegn da las persunas da contact durant la quarantina

Persunas, che vegnan identifitgadas en il rom da la retrofastisaziun dals contacts (contact tracing) sco persunas che han gì stretg contact cun pazientas e pazients malsauns, vegnan messas sut quarantina. L’Uffizi da sanadad Grischun surveglia ed accumpogna las pazientas ed ils pazients che sa chattan a chasa en quarantina tenor la Lescha federala davart il cumbat cunter malsognas transmissiblas da l'uman (lescha d’epidemias) e tenor la Lescha da sanadad dal Grischun. L’accumpagnament da las persunas da contact vegn surpiglià dal COVID Care Team da l’Uffizi da sanadad Grischun.

Furmas da sustegn

Cussegliaziun al telefon

En cas d’isolaziun en consequenza d’ina infecziun COVID-19 stattan las pazientas ed ils pazients en contact telefonic cun lur media u cun lur medi da chasa (sch’in tal/ina tala è avant maun), uschiglio cun il COVID Care Team da l’Uffizi da sanadad Grischun. Danor las fin d’emnas vegnan las pazientas ed ils pazients interrogads mintga di davart lur stadi da sanadad. Igl è era pussaivel da dumandar per dapli sustegn, per exempel per la cumpra da victualias.
Las persunas da contact ch’èn en quarantina vegnan mintga di contactads telefonicamain (danor las fin d’emnas) dal COVID Care Team da l’Uffizi da sanadad Grischun. Ellas vegnan interrogadas mintga di davart lur stadi da sanadad. Igl è era pussaivel da dumandar per dapli sustegn, per exempel per la cumpra da victualias.

APP COVID Care

Pazientas e pazients infectads dal COVID-19 e las persunas da contact pon sa decider per ina soluziun cun ina app sco alternativa a la cussegliaziun telefonica. La app noda mintga di cun agid da messadis da push il stadi da sanadad da las persunas pertutgadas e rapporta davart quests resultats a l’Uffizi da sanadad Grischun. Sch’il stadi da sanadad s’agravescha, contactescha il COVID Care Team da l’Uffizi da sanadad Grischun la persuna pertutgada.

Premissas per s’annunziar en l’app

Vus pudais As registrar per l’app, sche

  • Vus essas domiciliads en il chantun Grischun e
  • sche Vus essas vegnids testads positivs sin il coronavirus (SARS-CoV-2) u sche Vus avais gì contact cun ina persuna ch’è vegnida testada positiva e
  • sche Vus avais retschavì las datas d’access da l’Uffizi da sanadad Grischun

Remartga: La registraziun en l’app è voluntaria. Sche Vus na vulais betg vegnir survegliads entras l’app, vegnis Vus sco fin qua accumpagnads per telefon.

Instrucziun per l’app

Ils puncts ils pli impurtants per l’annunzia chattais Vus en l’instrucziun. Per plaschair As drizzai en cas da dumondas per mail al support da l’app COVID Care.

Cuntanschibladad COVID Care

Il team COVID Care è cuntanschibel cun l’app via in messadi u per in sustegn al telefon sut il numer 081 254 16 60 da glindesdi a venderdi da las 8.00 a las 17:00.

Cas medicinals urgents ordaifer il temp da cuntanschibladad dal team COVID Care

Per plaschair contactar Vossa media u Voss medi da chasa, Vus pudais uschia eruir il medi d’urgenza che ha servetsch

En cas d’urgenza contactai immediat la centrala d’alarm sanitar Grischun sut il numer 144.

Link tar ils numers da telefon regiunals dals medis en servetsch dal chantun Grischun

ÄrzteNumer da telefon
Alvra (Dr. Domenic Ganzoni, Bergün)081 407 11 23
Alvra (Dr. Harald Jung, Alvaneu)081 404 20 30
Arosa0848 705 000
Claustra081 410 25 22
Cuira081 252 36 36
Engiadin’Ota081 833 14 14
Engiadina Bassa081 864 12 12
Glion e conturn0844 500 300
Mesolcina091 966 34 11
Panaduz / Plaun0844 500 144
Partenz davant (Vorderes Prättigau)0848 081 081
Puschlav081 839 11 00
Signuradi, 5 vitgs081 354 99 66
Tavau0844 003 003
Trin/Flem/Laax/Falera0848 17 17 17