Il Grischun ha actualmain il pli aut dumber da cas dapi l’entschatta da la pandemia. Il dumber da tests positivs tar ils tests en manaschis è sa multiplitgà fermamain en las davosas emnas, quai chaschuna ch’il volumen da tests surpassa las resursas dals labors. Quai ha sco consequenza che las provas na san betg vegnir analisadas a temp util. Perquai vegnan las capacitads dals labors che lavuran per il chantun Grischun amplifitgadas per la mesadad da december.

Mesiras immediatas tar ils tests en manaschis
Per tuttina porscher ils tests en manaschis a tut las interpresas, vegn il dumber maximal da tests limità a partir d’immediat: Per persuna pon ins per entant anc far maximalmain 3 tests per emna. Persunas cun sintoms (vaccinadas e betg vaccinadas) èn supplitgadas da betg sa laschar testar via ils tests en il manaschi, mabain en in post da test uffizial (center da test, medi da chasa u apoteca)

Persunas da contact duain sa laschar testar mo anc mintga 2. di. Tgi che dovra en cas d’excepziun ina frequenza da test pli auta, duai sa laschar testar ils dis intermediars cun tests svelts en in center da test uffizial.

Persunas vaccinadas na duain da principi betg sa laschar testar regularmain e maximalmain mo 1 giada l’emna cun tests en il manaschi.

Sch’i na grategia betg da reducir cun las mesiras menziunadas survart la quantitad da tests sin las capacitads da labor, ston ins examinar ulteriuras mesiras (per exempel l’interrupziun dals certificats da test gratuits). Finamira da la mesira è da mantegnair la funcziun dals programs da testar.

Il certificat n’è actualmain betg garantì entaifer 48 uras
Ils certificats da covid che resultan da tests en manaschis restan probablamain gratuits enfin la fin da la stagiun d’enviern. Pervi dal grond volumen da tests en ils labors na po la consegna gratuita dal certificat da covid ord tests en ils manaschis betg vegnir garantida entaifer 48 uras. A persunas ch’èn urgentamain dependentas d’in certificat èsi recumandà da sa render en in post da testar (center da test, medi da chasa u apoteca).

Gidai cun ulteriuras mesiras d’igiena
L’uffizi da sanadad renda attent che limitar contacts, purtar mascrinas, dar regularmain aria e lavar ils mauns contribueschan da franar l’unda d’infecziun actuala.

Grazia fitg per Vossa chapientscha e Voss agid!