Navigation

Inhaltsbereich

Tests en ils manaschis

Infurmaziuns per collavuraturas e collavuraturs

Grazia fitg per Voss interess per ils tests planisads e sistematics en ils manaschis en il Grischun. Nus ans legrain, sche Vus As participais als tests regulars en Voss manaschi. Vus gidais uschia essenzialmain a franar la pandemia da COVID-19.

Sch'il manaschi, nua che Vus lavurais, è s'annunzià per ils tests en ils manaschis, survegnis Vus automaticamain in e-mail cun l'invit d'As registrar persunalmain. La registraziun vegn fatga sin ina plattafurma d'internet en conturns protegids. Vossa patruna u Voss patrun n'ha nagin access a Vossas datas, el survegn sulettamain datas anonimisadas e resumadas (p.ex. dumber total dals tests fatgs, dumber total dals resultats positivs / negativs). Las datas da sanadad e las infurmaziuns dal questiunari na pon – per motivs da la protecziun da datas – betg vegnir consultadas da las interpresas (plattafurma criptada e protegida).

Duai jau ma participar, sche jau hai gia COVID-19?

Gea. Il questiunari sin la plattafurma dals tests en ils manaschis è concepì uschia, che quest aspect vegn resguardà e che Vus vegnis clamà ad ura al test.

Duai jau ma participar, sche jau sun gia vaccinada/vaccinà?

Gea. Il questiunari sin la plattafurma dals tests en ils manaschis è concepì uschia, che quest aspect vegn resguardà e che Vus vegnis clamà ad ura al test, sche quai è necessari.

Da tge tip da test sa tracti?

Per ils tests en ils manaschis vegnan fatgs tests da spida. Quests tests pon vegnir fatgs facilmain a chasa, en moda simpla e nuncumplitgada.

Quant savens duai jau far in test?

Cur che Vus As annunziais sin la plattafurma, emplenis Vus in questiunari davart Voss stadi da sanadad e davart Vossa mobilitad. Sin basa da quest questiunari vegni calculà, en tge intervals che Vus duais far in test. Cur ch'igl è uschè lunsch, survegnis Vus mintgamai in avis e faschais lura sezza resp. sez il test.

Vesa mia patruna u mes patrun, co che mes "profil da ristgas" guarda ora?

Na. Per motivs da la protecziun da datas avais mo Vus sezza resp. Vus sez invista da questa infurmaziun.

È mia anonimitad garantida da tut temp?

Vossas datas na vegnan transmessas a naginas terzas persunas, er betg a Vossa patruna u Voss patrun. Mo en cas ch'il resultat d'in test è positiv, survegn il team dal contact tracing access a Vossas datas per pudair As contactar.

Quant fidabel è il test da spida?

Il test da spida è in test da PCR (medema procedura sco tar il sfrusch dal nas u da la gula) ed è fitg fidabel.

Co fatsch jau il test?

Il test è fitg simpel e dovra mo pauc temp. Ina instrucziun detagliada chattais Vus qua. Nus As supplitgain da far il test la damaun avant che lavar ils dents.

Tge fatsch jau, sch'i n'ha betg in code a travs sin la bavrola?

Giai per plaschair per ina nova bavrola.

Tge capita, sche jau manchent il termin d'in test?

Prendai suenter il test il pli svelt pussaivel.

Quant stoss jau pajar per quest test?

Il test è gratuit per Vus!

Nua retir jau il test?

Ils sets da test pon vegnir retratgs en Voss manaschi a la «staziun da prender». Vus duessas adina avair in set da test a chasa.

Po mia patruna u mes patrun m'obligar da far ils tests?

Na. I n'exista nagina obligaziun da far tests.

Tge capita, sche jau vuless terminar la seria da test?

Tant per Vus sco er per il manaschi èsi da tut temp pussaivel da terminar la seria da test. Quai na vegn dentant betg recumandà.

Po mia patruna u mes patrun prender invista dal resultat da mes test?

Na. Cun excepziun da l'Uffizi federal da sanadad publica (UFSP) e da Vus sezza resp. da Vus sez n'ha nagin access al resultat – ed il resultat na po vegnir dumandà nagliur e da nagin.

Da tge datas po mia patruna u mes patrun prender invista?

Da naginas. Vossa patruna u Voss patrun survegn unicamain infurmaziuns generalas che pertutgan l'interpresa, per exempel il dumber da tests fatgs en il manaschi, la rata da positivitad e.u.v. I n'è betg pussaivel da trair conclusiuns a singulas persunas.

Tge capita cun mias datas ch'èn deponidas sin la plattafurma?

Quellas vegnan duvradas per generar Voss profil da ristgas. Suenter ch'ils tests en ils manaschis èn terminads, vegnan ellas stizzadas. Legiai en quest connex per plaschair la decleraziun da consentiment e las disposiziuns davart la protecziun da datas sin la plattafurma.

En tge linguas stat la plattafurma a disposiziun?

Vus pudais tscherner tranter tudestg e talian.

Jau fatsch homeoffice e lavur da chasa anora. Duai jau tuttina ma participar?

En mintga cas! Empleni il questiunari ed inditgai che Vus lavurias da chasa anora. Quai vegn resguardà en il profil da ristgas.

Tge capita, sche jau stoss ir en quarantina, perquai che jau hai gì contact cun ina persuna infectada?

La regulaziun da quarantina vegn adattada per las interpresas participantas: Sche Vus avais gì stretg contact (main che 1,5 meters distanza durant dapli che 15 minutas senza protecziun adattada) cun ina persuna infectada, na stuais Vus betg ir en quarantina. Vus pudais lavurar vinavant, sche Vus n'avais vinavant nagins sintoms e sch'ils tests che Vus faschais en il rom dals tests en ils manaschis èn vinavant negativs.

Tge fatsch jau, sch'il resultat da mes test è negativ?

Sch'il resultat da Voss test è negativ, lavurais Vus vinavant sco usità ed observais consequentamain las mesiras da protecziun e d'igiena actualas. Vus survegnis automaticamain in avis electronic per far il proxim test.

Tge fatsch jau, sch'il resultat da mes test è positiv?

Sch'il resultat da Voss test è positiv, stuais Vus ir immediatamain en autoisolaziun. I n'è betg necessari da far in test posteriur, perquai ch'il test da spida PCR è renconuschì uffizialmain. Vus vegnis contactada resp. contactà dal contact tracing dal Grischun ed infurmada resp. infurmà davart l'ulteriur proceder.

Dastg jau lavurar vinavant sco usità, entant che jau spetg sin il resultat dal test?

Gea – sche Vus observais las mesiras da protecziun e d'igiena actualas e premess che Vus n'hajas nagins sintoms.

Quant ditg vai, fin ch'il resultat dal test è avant maun?

Il resultat dal test è per regla avant maun entaifer 24 uras suenter ch'el è arrivà en il labor.