Navigation

Inhaltsbereich

Tests da classa èn pensads per tschertgar persunas minimalmain sintomaticas u asintomaticas. Quai vul dir, en cas da sintoms da malsogna evidents duain las persunas (scolaras e scolars u persunas d’instrucziun) restar a chasa. Sch’ins frequenta la scola cun sintoms minimals, pon ins era participar al test.

Per evitar pools da classa positivs sbagliads, na duain persunas betg participar als tests en scola, sch'ellas han gì COVID-19 entaifer ils ultims sis mais.

Grazia per Voss interess per ils tests regulars e sistematics en las scolas dal chantun Grischun.

Nus ans legrain sche Voss uffant sa participescha als tests regulars en scola. Cunquai contribuis vus fermamain a reducir la pandemia da COVID-19.

Grazia fitg che nus pudain quintar cun Vossa collavuraziun.

Avais Vus dumondas davart la procedura dals tests en scolas?

Qua As declerain nus gugent ils detagls da la procedura dals tests.

Documents che vus duvrais per il process d’annunzia da voss uffant en scola vengan repartids da la scola.

 

 

Poss jau annunziar mes uffant pli tard, era sch’ils emprims tests èn gia vegnids fatgs en scola?

Ins sto far ina dumonda a la direcziun da la scola.

Dastga mes uffant ir a scola, era sch’el n’è betg annunzià per ils tests en scola?

Gea. L’uffant dastga vinavant frequentar la scola, el na sa lascha simplamain betg testar.

Co stoss jau proceder, sche jau hai annunzià mes uffant, ma vi dentant puspè revocar l’annunzia per ils tests?

Ins sto annunziar quai a la direcziun da la scola.

Èn quests tests en scola obligatorics per tut ils uffants?

Na. La participaziun è voluntara. Las persunas responsablas per l’educaziun decidan sch’ellas laschan participar lur uffant.

Tgi ha invista en mias datas persunalas?

La direcziun da la scola chargia las datas sin il portal web. Il labor retira las datas da là.

Datti in formular d’annunzia?

Na. I dat in scriver che vegn tramess entras la scola als responsabels per l’educaziun. Là chattais Vus in code QR ch’As maina a l’annunzia.

Vegnan quests tests realisads en scola?

Gea. Ils tests han lieu durant l’urari regular.

Pon ils geniturs vegnir en scola per guardar co ch’ils tests vegnan realisads?

Na. Ils tests han lieu durant l’instrucziun regulara cun la persuna d’instrucziun.

Fa ina spezialista medicinala ils tests?

La persuna d’instrucziun fa ils tests cun la scolaras e cun ils scolars.

Quant savens vegnan las scolas testadas?

Mintg’emna.

Tge cuntegna il liquid en la bavrola?

I sa tracta d’ina soluziun da sal fisiologica (NaCL 0.9%) che n’è absolutamain betg nuschaivla per la sanadad dals uffants e dals giuvenils.

Vegn duvrà il numer da la cassa da malsauns?

Na, il numer da la cassa da malsauns na vegn betg duvrà. Sche Vus avais ina veglia decleraziun da consentiment, nua ch'il numer da la cassa da malsauns vegn dumandà, na stuais Vus betg emplenir quest champ.

Sche jau na lasch betg testar mes uffant ed i dat in cas positiv en la classa, sto mes uffant lura ir en quarantina?

Gea, sch’i dat in cas positiv en la classa, ston ils uffants betg testads adina ir en quarantina. Senza test na pon ins betg excluder ch’els èn er infectads e pudessan infectar auters. La durada da la quarantina vegn fixada da cas a cas. Quai dependa dal dumber dals uffants pertutgads d'ina classa, d'ina scola, d'in vitg. Decisiv è er, sch'i sa tracta d'in virus mutà u betg. En cas d'uffants betg testads po la quarantina pertutgar er ils geniturs en il cas singul.

Tenor pussaivladad pon ins laschar testar l’uffant pli tard. Quai sto dentant eventualmain vegnir organisà sin basa privata.

È il test posteriur er in test da spida?

Gea. I vegnan duvrads mo tests da spida. I na vegnan fatgs nagins sfruschs dal nas u da la gula.

Sche jau lasch testar mes uffant, sto el ir en isolaziun per 10 dis en cas d’in resultat da test positiv?

Correct. Il COVID Care Team dal chantun As contactescha per reglar ils proxims pass.

Sche jau lasch betga testar mes uffant, sto el ir en isolaziun per 10 dis en cas d’in resultat da test positiv?

Correct. Il COVID Care Team dal chantun As contactescha per reglar ils proxims pass.

Ston ils geniturs pajar per il test da lur uffant?

Na, il test è gratuit per las persunas responsablas per l’educaziun.

Co sai jau tge resultat da test che mes uffant ha?

En in emprim pass vegn be l’emprova da classa (Pooling) tramessa al labor. En cas d’in resultat positiv, vegnan las persunas pertutgadas testadas da maniera singula. Sch’in resultat è positiv, vegnan las persunas responsablas per l’educaziun infurmadas directamain.

Sche mes uffant è vegnì testà positiv, tge stoss jau far sco mamma/bab?

L’uffant sto ir per 10 dis en isolaziun. Il COVID Care Team dal chantun sa metta en contact cun la famiglia e discuta co proceder vinavant.

Ston commembers da la famiglia ir en quarantina, sch’ina persuna è vegnida testada positiv en scola?

Il COVID Care Team dal chantun sa metta en contact cun la famiglia pertutgada e determinescha ils proxims pass.

Duai jau ma participar, sche jau sun gia vaccinada u vaccinà?

Persunas cumplainamain vaccinadas* cun sintoms duain en mintga cas sa laschar testar.
Persunas cumplainamain vaccinadas* senza sintoms na duain betg pli far part dals tests repetitivs (tests da manaschi u da scola). I n’è dentant betg scumandà.

*duas dosas da vaccinaziun u ina dosa da vaccinaziun suenter avair gì la malsogna Covid

Per quant ditg èn quests tests planisads?

Presumablamain fin la primavaira 2022.

Documents