Navigaziun principala

Cuntegn da la pagina

Agids da liquiditad per interpresas da la Confederaziun e dal chantun

Access rapid

Agids da liquiditad da la Confederaziun

Agids da liquiditad dal chantun

 

En consequenza da serradas da manaschis sco era d’ina reducziun massiva da la dumonda da consum disponan numerusas interpresas adina da pli pauc liquiditad per lur custs currents, quai malgrà l’indemnisaziun per lavur curta e per la cumpensaziun dal gudogn. Cun differentas mesiras cumplementaras duai vegnir impedì ch’interpresas, ch’èn da princip solventas, vegnan en difficultads.
interpresas, ch'èn da princip solventas, survegnian difficultads.

MESIRAS DA LA CONFEDERAZIUN

La Confederaziun ha decidì sco mesira immediata agids da liquiditad per interpresas en furma d’in program da garanzia (garanzias solidaricas).

Interpresas singulas, societads da persunas u persunas giuridicas pertutgadas duain retschaiver spert ed a moda nuncumplitgada credits transitorics COVID-19 da las bancas. Quests credits vegnan garantids cun garanzias solidaricas concedidas da las organisaziuns da garanzias. La Confederaziun distingua en quest connex tranter duas pussaivladads da credit che pon vegnir tratgas a niz:

  • Credit COVID-19 10 % da la svieuta annuala, fin maximalmain fr. 500 000.--

    Fin a fr. 500 000.- vegnan ils credits concedids pajads a moda nunbirocratica ed a curta vista. La Confederaziun surprenda la garanzia solidarica cun 100 %. Il tschains per quests credits transitorics munta actualmain a 0 %. Mintga interpresa dastga far be ina dumonda da credit Covid-19 tar ina banca.

  • Credit COVID-19 plus 10 % da la svieuta annuala, da fr. 500 000.- fin maximalmain fr. 20 miu.

    Credits transitorics che surpassan la summa da fr. 500 000.- vegnan segirads per 85 % da la Confederaziun. La banca che dat il credit sa participescha cun 15 % al credit. Tals credits pon muntar fin a 20 milliuns francs per interpresa (main fr. 500 000.- dal credit COVID-19) e basegnan perquai ina examinaziun bancara pli extendida. Il tschains per quests credits transitorics munta actualmain a 0.5 % sin l’emprest segirà da la Confederaziun. Remartga: L’emprim sto ina cunvegnientscha per in credit COVID-19 vegnir inoltrada (guarda sura), avant ch’ina dumonda per in credit COVID-19 plus po vegnir fatga.

Tar la dumonda per credits COVID-19 da la Confederaziun

Ultra da quai ha la Confederaziun prendì suandantas mesiras:

  • Dilaziun dals pajaments tar las contribuziuns da l'assicuranza sociala
  • Puffer da liquiditad en il champ da taglia e per furniturs da la Confederaziun
  • Moratori tenor lescha federala davart scussiun e concurs (LSC)
  • Mesira en il champ dal provediment professiunal

MESIRAS DAL CHANTUN

  • Il chantun Grischun conceda in credit general dad 80 milliuns francs per las garanzias solidaricas chantunalas, cumplettond las garanzias solidaricas da la Confederaziun.
    • Cumplettond la Confederaziun ed a moda subsidiara conceda il chantun garanzias solidaricas dad 80 milliuns francs. Questa garanzia solidarica è limitada a maximalmain 15 pertschient dal retgav da la svieuta ed a 5 milliuns francs per interpresa. Ensemen cun ils credits COVID-19 da la Confederaziun ed ils credits COVID-19-GR dal chantun pon ins uschia far la dumonda per credits che muntan fin a 25 % dal retgav da la svieuta, dentant maximalmain a 25 milliuns francs en il cas singul (20 milliuns Confederaziun, 5 milliuns chantun).
    • A la dumonda per credits COVID-19 dal chantun
  • La Regenza grischuna ha decidì e communitgà ils 13 da mars 2020, ch’ella veglia sustegnair l’economia e la populaziun il meglier pussaivel en questa situaziun actualmain difficila.
    Ella ha perquai engaschà ina «Task Force economia» cun represchentantas e represchentants dal Departament d'economia e fatgs socials, dal Departament da finanzas e vischnancas (GR) sco era da la Banca chantunala (GKB) che elavureschan mesiras da sustegn pussaivlas per las interpresas pertutgadas.
    Il chantun ha ultra da quai convocà ina maisa radunda cun represchentantas e represchentants da l’economia. Questas sesidas han lieu regularmain. Là po l’economia far valair lur quitads e lur dumondas. Igl è era impurtant d’enconuscher las sfidas specificas dal chantun per pudair reagir a moda intenziunada.

    Mesiras decididas dal chantun Grischun:
    • Culanza tar termins da pajament e renunzia da tschains da retard e da taxas d'admoniziun: Fin la fin da l'onn 2020 vegni renunzià d'incassar tschains da retard e taxas d'admoniziun per quints dal chantun sco taglias, taxas e multas. Pervia d'in conclus dal Cussegl federal èn las scussiuns interruttas fin ils 19 d'avrigl 2020.

      La pussaivladad da prolungar il termin da pajament per quints dal chantun che n'èn anc betg pajads u da permetter in pajament en ratas vegn applitgada da l'administraziun chantunala en moda generusa per interpresas e per persunas che na pon actualmain betg pajar lur quints pervia da l'epidemia da corona.

      Per augmentar la liquiditad dals purschiders da prestaziuns e dals furniturs dal chantun, vegnan tut ils quints entrads controllads directamain da l'administraziun chantunala e pajads uschè svelt sco pussaivel, suenter ch'els èn vegnids approvads internamain. La Regenza appellescha a tut las vischnancas ed a tut ils instituts da dretg public sco er a tut ils manaschis dal chantun organisads tenor dretg privat, da far sche pussaivel il medem sco ella.
    • Culanza en connex cun modalitads da restituziun per emprests dal chantun e da la NPR: Il chantun è culant en connex cun modalitads da restituziun per emprests dal chantun e da la Confederaziun ch'èn vegnids deliberads sa basond sin la Lescha davart il svilup economic u sin la nova politica regiunala da la Confederaziun (NPR). Il chantun è pront d'examinar en il cas singul soluziuns cun ils emprestants pertutgads concernent ils pajaments d'amortisaziun.
    • Tractar en moda prioritara las surdadas da lavurs dal chantun: Las proceduras da surdada vegnan cuntinuadas e liquidadas sche pussaivel senza retard. Grazia al mantegniment da l'activitad da surdada tras il chantun pon las interpresas stgaffir reservas d'incumbensas e planisar en moda pli lianta l'andament dals affars. Las difficultads en las proceduras che sa mussan vegnan – dapertut nua che quai è pussaivel – schliadas en moda pragmatica (p.ex. pussaivladads da sa participar a las averturas da las offertas per videotelefonia).    

  

enavos tar la survista