Isolaziun e quarantina èn mesiras per interrumper chadainas d’infecziun ed uschia franar ch’il nov coronavirus vegnia derasà vinavant. Questas mesiras pertutgan persunas, tar las qualas in’infecziun è vegnida confermada u che vegnan suspectadas d’esser infectadas. Il suspect exista per exempel sin fundament da sintoms tipics da la malsogna u suenter stretg contact cun ina persuna infectada da Covid-19.

Schema da procedura isolaziun e quarantina

Isolaziun

Tgi ch’è vegnì testà positivamain sin il nov coronavirus sto tenor instrucziuns da l’autoritad chantunala responsabla sa render en isolaziun. Isolaziun munta ch’ins resta a chasa ed evitescha tut ils contacts cun autras persunas.

Quarantina

Durant la quarantina stattan ins a chasa ed evitescha il contact cun autras persunas. Ina persuna, ch’è stada en stretg contact cun ina persuna infectada dal nov coronavirus, sto tenor instrucziuns da l’autoritad chantunala responsabla sa render en quarantina. Qua tras po ella evitar d’infectar senza savair autras persunas.

Stretg contact vul dir che Vus avais gì pli pauc che 1,5 meters distanza senza protecziun (p.ex. paraid da separaziun u sche domaduas persunas portan ina mascrina) tar ina persuna infectada. Pli ditg ch’ins ha contact cun ina persuna infectada e pli probabla ch’ina infecziun è.

Las autoritads chantunalas e la persuna infectada evalueschan communablamain tgi ch’èn las «persunas da stretg contact». Las autoritads chantunalas s’annunzian tar Vus, sch’ina persuna infectada As ha inditgà sco «stretg contact». Lura intervegnis Vus tge ch’è da far.

Coronavirus: proceder en il cas da sintoms e d’ina infecziun probabla

Tests

Cun il check coronavirus UFSP èsi il pli simpel da chattar ora, sche Vus duais laschar far in test. Alternativamain pudais Vus era contactar Vossa media u Voss medi e discutar cun el/ella, sch’in test vegn recumandà.

Faschai in test, sch’il check da coronavirus u Vossa media/Voss medi As recumonda quai. Restai a chasa ed evitai tut ils contacts cun autras persunas fin ch’il resultat dal test è avant maun.

Pussaivladads da far il test

As drizzai per plaschair a Vossa media/Voss medi da chasa u contactai il proxim ospital. Inditgai che Vus avais gia fatg diever dal check coronavirus UFSP e che Vus avais survegnì la recumandaziun da prender si contact.

Sorts da tests

Test da PCR

Il test da PCR constatescha entaifer 24-48 uras entras in sfrusch dal nas e da la gula u da la gula, sche Vus As essas infectads cun il nov coronavirus. Il sfrusch vegn manà tras da Vossa media/Voss medi u dals ospitals.

Test spert d’antigens

Tests sperts d’antigens inditgeschan il resultat dal test entaifer 15 fin 20 minutas. Els vegnan manads tras da persunal spezialisà medicinal cun agid d’in sfrusch dal nas e da la gula. Tests sperts vegnan purschids en il Grischun per il mument en praticas da medis, en ospitals ed en centers da test.

In test spert d’antigen po vegnir tratg en consideraziun, sche Vus avais sintoms dal nov coronavirus e sche tut ils criteris èn ademplids:

• Voss sintoms han cumenzà avant pli pauc che 4 dis.
• Vus na tutgais betg tar las persunas spezialmain periclitadas.
• Vus na lavurais betg en il sectur da sanadad cun contact direct tar pazientas e pazients.
• Vus vegnis tractads ambulantamain.

Resguardai per plaschair tar ils tests las prescripziuns exactas da l’Uffizi federal da sanadad publica (UFSP).

Center da test da corona Grischun dal Nord

Il center da test corona Grischun dal Nord (Ospital chantunal a Cuira) n’è betg in center da test walk-in; tgi che vul laschar far in test, sto necessariamain s’annunziar ordavant per telefon via la hotline da Covid-19 da l’Ospital chantunal: tel. 081 256 72 07 (mintga di da las 08.00 fin las 20.00 uras). Il center da test sa chatta visavi la fermada dal bus (lingia 4) sin la plazza da l’ospital.

Center da test da corona Grischun dal Sid

In’annunzia à l'Ospidel d'Engiadin'Ota ordavant è indispensabla per ch’ils standards d’igiena possian vegnir resguardads ed in manaschi senza incaps saja garantì. Suenter l’annunzia vegn tramess ina confirmaziun da termin per e-mail. Ensemen cun la confirmaziun da termin survegn il pazient in questiunari, ch’el sto emplenir e prender cun el al termin da test.

Staziun da test da corona a l’Ospidal

In test a la staziun da test da COVID-19 al Center da sanadad Engiadina Bassa po sulettamain vegnir fatg suenter l’annunzia entras in medi e suenter avair fixà in termin. Per plaschair prendai cun Vus al test il formular da contact gia emplenì.

Surpigliada dals custs

Las reglamentaziuns actualas pertutgant la surpigliada dals custs da tests e da las prestaziuns medicinalas chaschunadas en quest connex chattais Vus sin la pagina d’infurmaziun da l’UFSP.

Pagina d’infurmaziun da l’UFSP tar la tematica dals tests