En Svizra è il consum da tubac anc adina ina da las pli grondas sfidas per il sectur da la sanadad publica. Bunamain dus milliuns persunas fiman – las consequenzas da quai èn gravantas: Il tubac è in dals pli impurtants facturs da ristga per malsognas betg transmissiblas e la pli frequenta raschun che fiss evitabla, per perder onns da vita e per restrenscher la qualitad da viver.

Las mesiras preventivas han la finamira d'impedir in cumenzament da la dependenza e da facilitar da chalar da fimar. La finamira surordinada èsi da pussibilitar en moda simpla e chapibla ina vita senza tubac e senza nicotin.

Purschidas per chalar da fimar

La campagna naziunala Mais senza fimar, che cumenza il 1. da november, porscha in sustegn concret a tuttas e tuts che vulan chalar da fimar. Durant 30 dis renunzian las participantas ed ils participants cuminaivlamain a products da nicotin e tubac sco cigarettas, vapes e snus. Accumpagnads vegnan els d'ina vasta communitad, d'expertas ed experts sco er d'ina purschida multifara en l'internet. Ils studis mussan: Tgi che tegna la dira durant in mais, per quel è la schanza 5 giadas pli gronda ch'el restia duraivlamain senza fimar.

Dapli infurmaziuns: rauchfreiermonat.ch

stopsmoking è la plattafurma naziunala che sustegna da chalar da consumar tubac e nicotin. Persunas che vulan chalar da consumar tubac u nicotin, profiteschan da cussegliaziuns specificas gratuitas per telefon u online.

Dapli infurmaziuns: stopsmoking.ch