Approximativamain 100'000 uffants creschan si en Svizra en in dachasa ch'è engrevgià fermamain d'alcohol u d'autras drogas. L'emna d'acziun naziunala che vegn coordinada da Dependenzas Svizra ha lieu quest onn dals 16 fin ils 22 da mars. En 15 chantuns fan numerusas organisaziuns passa 37 acziuns.

Quest onn vegn il focus er mess sin in meglier sustegn dals geniturs. La nova pagina d'internet «Elternschaft und Sucht» porscha latiers cunzunt infurmaziuns per persunas dal fatg che cumpletteschan ils cussegls e las perspectivas d'acziun per geniturs ed il conturn.

Durant l'otgavla «Emna d'acziun naziunala per uffants da geniturs cun ina malsogna da dependenza» survegnan quests uffants ina vusch. Numerusas organisaziuns porschan tar quai activitads cun effect en la publicitad. Er intginas persunas pertutgadas ch'èn oz creschidas rapportan da lur experientschas. Las activitads duain encuraschar la populaziun da tegnair ils egls averts e da gidar ad uffants pertutgads a chattar sustegn. La broschura «Was kann das Umfeld tun?» mussa, co ch’ins tschertga il discurs cun geniturs ed uffants pertutgads e co ch’ins po esser qua per els.

Nov è quest onn la pagina d'internet «Elternschaft und Sucht» per persunas dal fatg. Ella furnescha las cumpetenzas necessarias a persunas dal fatg, sch'ellas han da far cun geniturs: Co è la dinamica en famiglia? Tge sfidas datti per ils geniturs ed ils uffants? Tge soluziuns èn pussaivlas, per ch'i giaja meglier cun l'entira famiglia?

Ulteriuras infurmaziuns davart il tema sco er rapports da persunas pertutgadas èn da chattar sin la pagina d'internet: www.kinder-eltern-sucht.ch