Ils 27 d'october 2026 èn represchentantas e represchentants da vischnancas grischunas, d'organisaziuns da sanadad e fatgs socials sco er differents departaments da l'administraziun chantunala sa scuntrads per il 3. workshop. Il suentermezdi è stà sut l'ensaina da la preschentaziun dals elements centrals dal Model directiv da vegliadetgna e dal discurs cuminaivel davart sia realisaziun.

En il center dal workshop èn stads trais formats da cooperaziun:

1. Preschentaziun dals elements centrals dal Model directiv da vegliadetgna
   Las participantas ed ils participants han survegnì ina invista da las finamiras cumplessivas ed ils terms dal Model directiv da vegliadetgna.
2. Plazza da fiera
   Sin paraids moviblas cun las finamiras cumplessivas ed ils terms han las participantas ed ils participants nudà sin post-its, tge contribuziun ch'els pon prestar sezs per cuntanscher las finamiras e per tge puncts ch'i dat – ord lur vista – anc in basegn da scleriment u dumondas avertas davart la realisaziun. Uschia è sa mussà in maletg illustrativ da las contribuziuns multifaras da vischnancas, d'organisaziuns professiunalas e da l'administraziun – ma er dals temas che ston en il futur anc vegnir sclerids cuminaivlamain.
3. Rundas da dialog davart exempels da good practice
   En rundas da dialog èn vegnidas partidas las experientschas cun exempels da la pratica. Per quest intent han referentas e referents externs preschentà mintgamai, en curts inputs, exempels da realisaziun reussids, avant che passar directamain al barat d'experientschas.

Ulteriur proceder e collavuraziun futura

Per finir èn vegnids explitgads ils proxims pass. Suenter è vegnida dumandada ina impressiun, co ch'il process duai cuntinuar en l'avegnir: Ils resultats vegnan integrads en la planisaziun da l'ulteriur proceder.

L'Uffizi da sanadad engrazia cordialmain a tut las persunas participadas per lur collavuraziun e lur engaschament grondius. Il barat avert ed ils resuns prezius da tut ils workshops èn ina contribuziun essenziala per pudair finalisar il Model directiv da vegliadetgna.