Ils 30 d'october stat il Di naziunal dals confamigliars che gidan sut l'ensaina da la stima. Qua tras vul il chantun Grischun engraziar a tut quellas persunas che surpiglian mintga di responsabladad per lur conumans – savens en il zuppà e senza pajament. Lur engaschament è ina contribuziun indispensabla per il bainstar da nus tuttas e tuts.

En Svizra tutga quai tar il mintgadi: mintga quarta persuna s'occupa regularmain d'ina persuna charezzada. Ch'i sajan geniturs, partenarias e partenaris, uffants u persunas enconuschentas – per bleras e blers sa chapeschi da sez da surpigliar l'assistenza, ma lur engaschament vegn darar percepì. Questa assistenza è però in element central da nossa societad.

In engraziament meritan er las organisaziuns che sustegnan persunas che assistan lur confamigliars. Posts da cussegliaziun, servetschs da distgargia u gruppas d'agid a sasez prestan ina contribuziun impurtanta, per che las persunas pertutgadas possian insumma dumagnar il mintgadi. Senza questas purschidas fiss la situaziun per bleras famiglias anc pli engrevgianta. En il rom d'ina acziun chantunala s'engaschan questas organisaziuns e repartan a las persunas che assistan e tgiran lur confamigliars passa 2000 balsams per ils lefs e broschuras d'infurmaziun. Il chantun Grischun engrazia cordialmain a las organisaziuns per quest sustegn prezius.

Nov a partir dal 1. da schaner 2027:

Sut tschertas premissas pon persunas che assistan lur confamigliars dumandar ina contribuziun d'assistenza mensila. Las regulaziuns exactas vegnan actualmain elavuradas. Uschespert ch'ellas èn cleras, infurmescha il chantun Grischun en chaussa.

Ulteriuras infurmaziuns chattais Vus sut:
tgirar-in-confamigliar.gr.ch
betreuende-angehoerige-schweiz.ch