Prevenziun da mobing en scolas

#standup – Iniziativa cunter mobing porscha material d'instrucziun ed instruments per promover las cumpetenzas socialas ed emoziunalas da las scolaras e dals scolars e sustegna las scolas a sviluppar ina cultura da scola caracterisada da premura ed attenziun. Durant l'introducziun, la realisaziun e la francaziun (durada ca. 1,5 onns) vegn la gruppa da project, che sa cumpona da persunas d'instrucziun da differents stgalims, da la lavur sociala da scola e da la direcziun da la scola, accumpagnada d'ina persuna spezialisada externa. Il project cumenza sin plirs plauns (sensibilisaziun, cumpetenzas d'agir, clima da scola e da classa). La finamira è ina francaziun dal project a lunga vista. In mussavia d'agir e la plattafurma d'annunzia anonima gidan las scolas a constatar a temp cas da mobing ed ad agir.

Gruppa/s en mira

Direcziuns da scola, persunas d'instrucziun, pedagogia curativa da scola e lavur sociala da scola da la scola populara

Finamiras dal project

Il persunal da scola è sensibilisà per la tematica dal mobing e sviluppa cuminaivlamain ina tenuta da guardar e d'agir.

Las scolaras ed ils scolars vegnan rinforzads en lur cumpetenzas social-emoziunalas.

In mussavia ch'è adattà per la scola per constatar a temp mobing e per intervegnir ad ura è vegnì elavurà e tut las persunas participadas a la scola enconuschan la plattafurma d'annunzia anonima.

#standup gida a cuntanscher in clima da scola che promova l'emprender e che augmenta il bainstar da las scolaras e dals scolars.

Cuntegns da la purschida

• Intermediaziun da la persuna spezialisada externa (accumpagnament dal process)
• Sustegn finanzial tut tenor la furma d'accumpagnament:
  Accumpagnament individual: Ils custs per la scola importan ca. 4200 francs (tut tenor la lavur da cussegliaziun; in'offerta vegn fatga tenor cunvegnientscha) / Las scolas pon dumandar in sustegn da fin 2000 francs tar il Post spezialisà per la promoziun da la sanadad
  Curs collectiv: Ils custs per la scola importan 1800 francs / Il Post spezialisà per la promoziun da la sanadad promova curs collectivs cun ina contribuziun
• Mintgamai in exemplar stampà dals moduls d'approfundaziun MindMatters «Mobing? – betg en nossa scola» e «Chattar e salvar amis e far part» incl. access a la versiun PDF.
• Access a furmaziuns supplementaras cun in connex tematic (p.ex. sur la SAPGR)
• Newsletter «Promoziun da la sanadad en scola»

Scolas commembras da la rait da scolas21 grischun profitan da contribuziuns finanzialas supplementaras.

Cundiziuns generalas

• Furmaziun d'ina gruppa da project che sa participescha activamain a la scolaziun e che ha avunda resursas per introducir, realisar e francar il project en la scola.
• Per promover ina chapientscha cuminaivla vegn almain in dals trais blocs da furmaziun supplementara definì sco furmaziun supplementara entaifer la scola per l'entir collegi.
• Per ils custs che resultan per la scola per l'accumpagnament extern dal process sco er per l'access a la plattafurma d'annunzia vegn fatga in'offerta.
• Intenziun da francar il project a lunga vista
• Examinaziun da la participaziun a la rait da scolas21

Links