La finamira suprema da la prevenziun da traffic è quella da prevegnir ad accidents da traffic. Uffants e giuvenils vegnan instruids en moda adattada a lur vegliadetgna e rendids attent als privels en il traffic sin via. Questa incumbensa impurtanta vegn realisada da polizistas e da polizists scolads spezialmain che visitan las scolas en intervals regulars. La furmaziun dal senn per il traffic tar uffants e tar giuvenils va da la scolina sur la scola primara ed il stgalim superiur fin a la scola professiunala.
Mintgamai il cumenzament da l'onn da scola vegnan visitadas tut las scolinas dal chantun. La scolaziun da las participantas e dals participants dal traffic ils pli giuvens ed ils pli flaivels ha prioritad. A las scolaras ed als scolars dal stgalim primar e dal stgalim superiur vegn la materia intermediada alternantamain en la stanza da scola, en l'iert da traffic (areal protegì) u en il percurs da velos pratic.
En l'iert da traffic emprendan ils uffants da la 1. fin la 6. classa ils signals da traffic ils pli impurtants e las reglas da precedenza. En l'areal protegì pon els applitgar quai en moda pratica. L'iert da traffic è movibel e vegn installà en in turnus da circa 5 onns en tut las regiuns dal chantun.
Il savair ir enturn en moda segira cun il velo ed il cumportament correct en il traffic sin via ston vegnir exercitads. La scolaziun pratica d'ir cun velo vegn fatga al lieu d'abitar dals uffants e serva a lur segirezza, per ch'els possian ir cun velo en moda autonoma e correcta tras il vitg. En quest connex vegnan exercitads spezialmain il sviar a sanestra e la precedenza da dretga. Questa purschida vegn offrida sin dumonda da las scolas.
Ina part impurtanta da la prevenziun da traffic è er la scolaziun cumplementara da giuvenils, perquai che quels na pon anc betg vegnir chastiads cun ina multa tenor la lescha davart las multas disciplinaras, sch'els surpassan las reglas dal traffic en la vegliadetgna da 10 fin 14 onns. Ad in suentermezdi da scolaziun cumplementara vegnan ils giuvenils rendids attent a lur surpassaments. Uschia emprendan els da surpigliar sezs responsabladad en il traffic sin via.
Material da scolaziun e d'infurmaziun
Concernent il material da scolaziun e d'infurmaziun renviain nus als suandants posts:
• Automobil Club da la Svizra
• Post da consultaziun svizzer per la prevenziun d'accidents
• Touring Club da la Svizra
• Associaziun Traffic ed Ambient
Instructuras ed instructurs da traffic da la polizia chantunala dal Grischun
Cuno G. Berther schef da la prevenziun
Martin Roffler
Ricardo Spadin
Cumpetents en las regiuns
Abraham Dolf Surselva /Foppa
Remo Repole Surselva/Cadi
Markus Meier Tavau/Landwasser
Corsin Farrér Val d'Alvra/Surses
Gian Thom Engiadina bassa, Val Müstair
Andrea Vetsch Bregaglia/Puschlav
Luan Lunghi Mesauc
