Cuntegn da la pagina

Commando

Segirezza en il Grischun, per las abitantas e per ils abitants, per ils giasts da vacanzas, per las participantas e per ils participants da congress sco er per passantas e per passants, quietezza ed urden per tuts. Per quai procuran las policistas chantunalas ed ils policists chantunals. Di e notg, onn per onn, da tutta aura, sin las vias dals pass e sin las autostradas, en la citad ed en la champagna, sin las muntognas e giu en las vals. Dapertut ed adina èn ellas ed els pronts per porscher agid, per surpigliar acziuns da salvament, per far retschertgas, per cumbatter la criminalitad e per prender mesiras da prevenziun. Adina stat l'uman en il center. Cun sia cumpetenza professiunala e sociala sa drizza la polizia tenor ils basegns da las burgaisas e dals burgais. Policista chantunala, policist chantunal – ina professiun cun sfidas tranter blers champs da tensiun, ina incumbensa pretensiusa en il servetsch da nossa cuminanza.