Cuntegn da la pagina

Ina polizia che tegna quint dals basegns da la glieud

Infurmaziuns davart la professiun da polizista u da polizist

Segirezza en il Grischun, per las abitantas e per ils abitants, per ils giasts da vacanzas, per las participantas e per ils participants da congress sco er per passantas e per passants, quietezza ed urden per tuts. Per quai procuran las polizistas chantunalas ed ils polizists chantunals. Di e notg, onn per onn, da tutta aura, sin las vias dals pass e sin las autostradas, en la citad ed en la champagna, sin las muntognas e giu en las vals. Dapertut ed adina èn ellas ed els pronts per porscher agid, per surpigliar acziuns da salvament e per far retschertgas. Adina stat l'uman en il center. Cun sia cumpetenza spezialisada e sociala sa drizza la polizia tenor ils basegns da las burgaisas e dals burgais. Polizista chantunala, polizist chantunal – ina professiun cun sfidas tranter blers champs da tensiun, ina incumbensa pretensiusa en il servetsch da nossa cuminanza.

Sin las proximas paginas As infurmain nus pli detagliadamain davart la scolaziun da la polizia e davart il process da recrutaziun. Vossas dumondas ans pudais Vus gugent communitgar cun il formular da feedback. Sche nus avain sveglià Voss interess e sche Vus vulais candidar per la scola da polizia, duvrai per plaschair il formular "Annunzia per l'examen d'admissiun". Nus ans legrain da far Vossa enconuschientscha!