En il chantun Grischun, cun sia topografia pretensiusa, gioga la rait da sendas e vias ina rolla impurtanta e centrala, saja quai per l'avertura da singulas valladas u saja quai sco part da las colliaziuns dal nord al sid sur las Alps. Actualmain sa divida la rait da vias chantunalas cun ina lunghezza da 1'591 km en las vias naziunalas (163 km), las vias principalas (595 km) e las vias da colliaziun (833 km).

Mobilitad

La gronda mobilitad che vegn appreziada sin la rait da vias bain mantegnida mussa er sias varts negativas en il svilup d'accidents. Malgrà l'augment da l'effectiv da vehichels, è il dumber d'accidents dentant tendenzialmain sa reducì. Ils motivs principals che chaschunan accidents èn sveltezzas memia grondas, surpassaments dal dretg da precedenza ed inattenziuns. Circa in terz da tut ils accidents èn accidents individuals. Ils accidents individuals vegnan il pli savens chaschunads pervia da sveltezzas memia grondas e pervia da l'influenza d'alcohol. L'evaluaziun d'accidents gida a meglierar cuntinuadamain la segirezza dal traffic. Da l'evaluaziun resultan indicaziuns statisticas davart la dumonda, quant savens ch'i dat accidents, sco er bleras ulteriuras enconuschientschas davart lieus, nua ch'i capitan il pli savens accidents e che duain vegnir neutralisads cun agid da mesiras architectonicas e da signalisaziuns.

Controllas spezialas

En il center da las activitads da la polizia da traffic stat la meglieraziun dal clima dal traffic cun la finamira da cuntanscher la segirezza subjectiva ed objectiva en il traffic sin via. Questa finamira po dentant mo vegnir cuntanschida cun controllas specificas. En il rom da la prevenziun d'accidents e da la segirezza dal traffic daventan stringentamain necessarias controllas situativas cun cleras finamiras sin plaun chantunal. En collavuraziun cun la polizia da regiuns vegnan realisadas permanentamain acziuns spezialas en l'entir chantun.