Ils 19 da november han las basas da la Polizia chantunala dal Grischun prendì encunter per la tschintgavla giada armas e muniziun. 136 persunas han profità da questa acziun da collectar armas ed han surdà gratuitamain lur armas e lur muniziun.
Las armas restituidas èn armas da chatscha, schluppets da sport e 73 armas d'ordonanza, principalmain carabinas e schluppets d'assagl, sco er 28 armas da fieu curtas. Ultra da quai èn vegnidas surdadas armas ad aria cumprimida e dudesch armas da stilettar.
Ils objects consegnads vegnan dismess correctamain tras il Post spezialisà per armas.
Repetiziun mintga 3 onns
Da princip pon armas e muniziun vegnir surdadas da tut temp a la Polizia chantunala dal Grischun. Cun las acziuns da collectar armas, che vegnan realisadas mintga 3 onns, duain las burgaisas ed ils burgais vegnir rendids attents sistematicamain a questa pussaivladad. La Lescha d'armas oblighescha ils chantuns da prender encunter gratuitamain armas e muniziun or da possess privat. Avant 3 onns han 167 persunas surdà tut en tut 190 armas e fitg blera muniziun.
Er collavuraturas e collavuraturs da las medias èn s'interessads per l'acziun da collectar armas ed han producì contribuziuns respectivas per las medias stampadas, per il radio e per la televisiun.