Ins senta directamain la tensiun e l'interess dals var 80 giuvenils da 14 fin 20 onns quest bel di da stad la fin da fanadur sin la plazza aviatica a Samedan. Sin differents posts da lavur han forzas d'acziun da la Polizia chantunala dal Grischun, da la Polizia militara da l'Armada svizra e da la Guardia aviatica svizra da salvament preschentà lur activitads durant stgars 2 uras a las persunas giuvnas.

Da la Polizia chantunala dal Grischun han las participantas ed ils participants emprendì tranter auter ils differents lieus d'acziun da las unitads spezialas, la professiun da polizist en general, ma er differents meds d'acziun.

Durant il suentermezdi han las giuvnas ed ils giuvens visità alternantamain en gruppas ils stans da preschentaziun da las organisaziuns participantas. Sin in stan da la Polizia chantunala dal Grischun han ellas ed els survegnì infurmaziuns davart las differentas activitads da la Polizia alpina, dals chauns da servetsch, da la gruppa da negoziaziun, da l'intervenziun, dal Servetsch da sgol da la polizia e dal Servetsch d'urden. Quellas e quels che han vulì, han pudì trair en vestgadira da protecziun dal Servetsch d'urden e sentir en directa, co che quai è dad esser polizista u polizist.

Ultra da quai èn vegnidas mussadas en spezial intervenziuns cun dronas durant la lavur quotidiana da la polizia.

Las collavuraturas ed ils collavuraturs da la Polizia chantunala dal Grischun n'han natiralmain betg mo vulì dar infurmaziuns als giuvenils. Sin in ulteriur stan han las giuvnas ed ils giuvens gist pudì cumprovar sezzas e sezs lur abilitads da far retschertgas. A maun d'in exempel concret han las gruppas dastgà sclerir in enguladitsch a Samignun.