La garascha da polizia a Cuira è dapi passa 40 onns in dals purschiders da servetschs entaifer la Polizia chantunala dal Grischun. Fin l'atun 2025 è ella vegnida sanada cun mesiras moderadas.
La gruppa Vehichels procura, che las forzas d'intervenziun da la Polizia chantunala dal Grischun sajan adina mobilas e prontas a l'acziun. Ella mantegna ils vehichels, cumpra e transfurma novs vehichels. Er è ella responsabla per reparaturas, per administrar il material e per ils cas da donns. La contabilitad dals vehichels e dals carburants tutga medemamain en il champ da cumpetenzas dal post da servetsch. El controllescha ils custs, fa las cudeschaziuns ed optimaziuns. Cun quests servetschs garantescha la gruppa Vehichels la disponibladad da tut temp, la segirezza e l'effizienza da l'entir parc da vehichels.
Equipar vehichels da servetsch daventa adina pli impurtant en il champ da lavur dal team.
Tant vehichels da patruglia sco er vehichels civils visitan las localitads da la garascha da polizia.
Per che la gruppa Vehichels possia furnir er en l'avegnir ils servetschs en la qualitad necessaria, han ins stuì sanar moderadamain la garascha da polizia. Il focus han ins mess sin l'augment da la segirezza a la plazza da lavur. Ils ascensurs per ils vehichels èn vegnids remplazzads tras models che correspundan a las normas actualas. En connex cun la sanaziun han ins er concepì in lavuratori modern (illuminaziun, lavurs da pictur) ed installà ina meglra ventilaziun. Suenter 4 onns èn las mesiras vegnidas terminadas l'atun 2025.