Il cumandant da la Polizia chantunala dal Grischun, colonel Walter Schlegel
Signur Schlegel, il settember 2022 ha lieu il curs introductiv per las unitads d'intervenziun dal Concordat da polizia da la Svizra Orientala (ostpol.ch). Vus avais la funcziun dal cumandant da curs. Tge vegn intermedià a las persunas d'intervenziun durant quest curs?
Il curs introductiv per las unitads d'intervenziun dal settember 2022 intermediescha e consolidescha la savida da basa sco er las abilitads per realisar intervenziuns. Cun tals curs dad ostpol.ch (per dapli infurmaziuns davart ostpol.ch à guardar sutvart) vegn fixà e persequità in standard en il concordat. Uschia datti in barat activ tranter ils differents corps. Quai promova e garantescha la qualitad da la lavur en il mintgadi.
Sin tge mettais Vus il focus principal en quest curs?
Per mai èsi impurtant, che las participantas ed ils participants dal curs vegnan scolads e furmads effizientamain e cun ina buna metodica e didactica per las acziuns pretensiusas. In trenament permanent garantescha, ch'il success d'emprender è persistent e procura per fermezza en la pratica, uschia ch'i po vegnir agì cun cleras intenziuns e cun rutina en in cas serius.
Pertge a Walenstadt, pia ordaifer il chantun Grischun?
Ina part dals moduls da scolaziun ha lieu a Cuira, pia en il Grischun. Impurtant n'è betg, en tge chantun ch'ils moduls da scolaziun han lieu, mabain ch'i stettian a disposiziun localitads ed implants da trenament adattads per quest intent. Perquai vegn quest curs manà tras quest onn a Walenstadt.
Exercizi da sajettar a distanza lunga
Exercizi da sajettar a distanza curta
Avischinaziun zuppada e protegida al lieu da l'eveniment
Davart ostpol.ch
Dal Concordat da polizia da la Svizra Orientala fan part ils chantuns Appenzell Dador, Appenzell Dadens, Glaruna, Grischun, Son Gagl, Turgovia, Schaffusa, la polizia dal Principadi da Liechtenstein sco er las polizias da las citads da Cuira e da Son Gagl. L'intent dad ostpol.ch è la cooperaziun e la coordinaziun da la scolaziun, da l'equipament, da la tactica d'acziun, da l'ulteriur svilup tecnic sco er da dar dumogn a las incumbensas. En cas d'eveniments pli gronds sustegnan ils commembers in l'auter. Il gremi directiv dal concordat è la Conferenza dals cumandants da polizia.