Il Grischun è il chantun ospitant dal 53. Annual Meeting WEF 2023. Per proteger il congress mundial collavura la Polizia chantunala dal Grischun cun bleras organisaziuns partenarias. Mez november èn lur represchentantas e represchentants s'inscuntrads per il rapport da coordinaziun.
Il manader general da l'acziun Segirezza WEF, il cumandant Walter Schlegel, ha beneventà ils giasts, tranter auter represchentantas e represchentants da l'Armada svizra, dal stab directiv da la polizia, dal Servetsch d'infurmaziun da la Confederaziun, dal Servetsch federal da segirezza, da l'Uffizi federal da polizia, da las autoritads politicas, da la Procura publica, dal Servetsch sanitar, d'interpresas da transport e d'ulteriuras organisaziuns.
A chaschun dal rapport èn vegnidas communitgadas l'intenziun dal manader general da l'acziun sco er las adattaziuns dal dispositiv. Igl è er stà ina finamira da l'inscunter da survegnir ina chapientscha cuminaivla da la situaziun e da la structura da cumond. Suenter ch'il WEF 2022 ha gì lieu per l'emprima giada la primavaira, han ins pudì integrar novas experientschas en il dispositiv per l'enviern.
La finala han tut las organisaziuns partenarias infurmà davart lur sectur, uschia er il president communal Philipp Wilhelm. El ha explitgà l'intenziun da la vischnanca da Tavau da promover la persistenza, en spezial areguard ils edifizis e stabiliments temporars.
Suenter il rapport uffizial han las participantas ed ils participants profità d'in barat bilateral per sclerir ultimas dumondas.