Il schef da la prevenziun da la Polizia chantunala dal Grischun, Marcel Trinkler, sustegna l'Institut svizzer da polizia (IPS) sco commember dal stab dal curs «Prevenziun da la polizia». Durant il curs d'ina emna instruescha el «Lavur da medias ed intervista» e fa trenaments d'intervista cun las participantas ed ils participants.
Las polizistas ed ils polizists cun experientscha emprendan en il curs en la Svizra centrala en emprima lingia d'analisar e da sviluppar mesiras da prevenziun. Ad ellas ed els vegnan intermediadas las noziuns fundamentalas da la lavur da prevenziun cun la savida da la psicologia da svilup e da la criminologia sco er da studis scientifics e da statisticas.
In focus metta il IPS dentant er sin la lavur da publicitad e da campagna. Qua vegn Marcel Trinkler en il gieu. Tut las participantas ed ils participants vegnan interrogads e registrads dad el tar in eveniment da polizia. Las preschentaziuns a las medias davant la camera analisescha Marcel Trinkler suenter ensemen cun las intervistadas ed ils intervistads.
Tema actual: En ina communicaziun a las medias ch'è vegnida publitgada dacurt han ils corps da polizia da la Svizra centrala explitgà, che numerusas annunzias d'emprovas da fraudar per telefon vegnian fatgas en ina nova versiun. «Pudais Vus ma descriver detagls davart quest nov tric?» vul Trinkler – che surpiglia la rolla d'in schurnalist – savair dal partenari d'intervista.
Messadis centrals!
«Sajas autentica u autentic, discurri en moda simpla ed hajas Vossa finamira davant egl – ils messadis centrals!» appellescha Marcel Trinkler a la classa.
El declera viceversa er, tge ch'ins duess evitar en l'intervista ed accentuescha quai en moda chapaivla per tuttas e tuts cun ils «don'ts». Sch'ins na possia betg respunder ina dumonda, duaja quai vegnir motivà. «Sche Vus manais in discurs preliminar cun las collavuraturas ed ils collavuraturs da las medias, daventais Vus pli segira u segir», finescha Marcel Trinkler l'instrucziun.