La Polizia chantunala dal Grischun sviluppa ed implementescha durant la perioda da l'onn 2022 fin l'onn 2025 in svilup dal persunal cumplessiv che duai porscher perspectivas a sias collavuraturas ed a ses collavuraturs. Cun in'occurrenza iniziala ha cumenzà ils 14 da settember ina fasa da project ch'è concepida en moda participativa, per elavurar in concept davart il svilup dal persunal.
Tut las collavuraturas ed ils collavuraturs duain enconuscher tant lur fermezzas sco er lur deblezzas e duain savair, nua ch'els han potenzial da svilup. Cun in svilup sistematic dal persunal resultan perspectivas. Las superiuras ed ils superiurs ston esser da tut temp en il cas da mussar a lur collavuraturas e collavuraturs questas pussaivladads. En quatter gruppas da project parzialas vegnan elavuradas – durant la perioda da settember fin primavaira 2024 – las tematicas davart manar persunal, carrieras professiunalas e mesiras da svilup en la direcziun da las acziuns da polizia sco er vegnan rimnadas ideas, generadas materialias e respundidas dumondas.
A chaschun da l'occurrenza iniziala ha Martina Riedi beneventà las passa 30 participantas e participants ch'èn sa reunids voluntarmain e che derivan da chantuns fitg differents dal Grischun. En sia preschentaziun ha la manadra da la partiziun HRM integrà il project Svilup dal persunal tematicamain en la nova strategia concernent HRM 2023–2033. Ella ha accentuà la schanza unica da concepir la Polizia chantunala dal Grischun cuminaivlamain sco patruna attractiva cun ina cultura da direcziun e d'interpresa correspundenta.
Cun la chanzun «Un'estate italiana» èn silsuenter vegnidas svegliadas emoziuns e regurdientschas dal campiunadi mundial 1990. Il manader dal project Reto Jegher ha cumpareglià la situaziun da partenza da la gruppa da lavur cun in prà verd, 4 ballas (represchentond ils projects parzials) ed in gol. El ha animà las participantas ed ils participants d'esser creativs e da metter en dumonda models fixs. Suenter in curt input davart las cundiziuns per ch'il svilup dal persunal reusseschia, è vegnida declerada la moda da lavurar agila da la gruppa da project. Equipadas simbolicamain cun ina balla da ballape èn las gruppas da project parzialas sa messas a lur lavur.