Examinaziun mobila da l'identificaziun tras in scan da las improntas dal det
La stad passada è – en la tecnica criminala – vegnì introducì il sistem automatic d'identificaziun da las improntas dal det AFIS@mobile. Quai è in ulteriur pass en la digitalisaziun, che sustegna la lavur mobila. Martin Hepberger, schef da la gruppa professiunala Tecnica dal Servetsch per la tecnica criminala, è stà preschent tar l'introducziun dal nov sistem en la gruppa da lavur ed è responsabel per sia applicaziun. El declera: "Improntas dals dets han però gia pli baud pudì vegnir scannadas digitalmain, ma mo en tscherts lieus cun telefonins ch'èn drizzads en spezialmain per quai. Ils apparats novs e bler pli pitschens èn repartids en l'entir chantun sin tut las basas da la polizia. Els pon vegnir purtads bain en ina giaglioffa da la giacca e pon vegnir colliads cun il telefonin da servetsch persunal."
Martin Hepberger declera, co ch'ils scans da las improntas dals dets pon vegnir transferids sin la app
La persuna che vegn controllada, metta tuts dus dents mussaders, in suenter l'auter, sin la platta da vaider da l'apparat. En la app dal telefonin da la polizista u dal polizist cumpara alura il resun. "Nagin resultat" cun ina trav verda, sche la persuna n'è betg registrada. Ina trav cotschna sa mussa, sche la persuna era pli baud gia ina giada vegnida tractada dal servetsch d'identificaziun. Ultra da quai cumparan er infurmaziuns ch'èn relevantas per la polizia. "Las infurmaziuns servan a l'atgna segirezza", di Hepberger. "Cun l'examinaziun detagliada da l'identitad vegn la polizia a savair dapli davart la persuna controllada." Improntas dals dets pon ultra da quai er vegnir scannadas da persunas mortas.
Cusseglier guvernativ Peter Peyer lascha sa scannar las improntas dals dets
Las unitads da datas èn suttamessas ad in termin da stizzar
Fermar ina persuna e verifitgar sia identitad sco mesiras polizialas èn regladas en l'artitgel 9 da la Lescha da polizia dal chantun Grischun. Cun il AFIS@mobile vegn fatga mo in'unica dumonda a chaschun d'ina controlla da persunas. "Suenter ina cumparegliaziun cun la banca da datas AFIS vegnan las datas puspè stizzadas immediatamain", punctuescha Hepberger. Praticamain tut ils corps da polizia da la Svizra ed il Corp da guardias da cunfin han introducì il AFIS@mobile. La banca da datas digitala vegn administrada da la Confederaziun.
Ulteriuras metodas per identifitgar persunas
La dactiloscopia, da la quala fa part il AFIS@mobile, è ina da trais proceduras per identifitgar persunas cun segirezza. Tar l'analisa dal DNA vegnan examinads en il labor chavels, emprovas dal sang u stgaglias da la pel. Schumellins d'in ov han il medem DNA. Il schema dals dents che la dentista u il dentist ha fatg, po dar ulteriuras infurmaziuns davart l'identitad d'ina persuna. L'onn 1904 aveva Alphonse Bertillon definì il signalament antropometric che cumpiglia 11 indicaturs d'ina persuna creschida sur 21 onns. Questa metoda na vegn betg pli applitgada ozendi.