NG112 pussibilitescha ina localisaziun fidabla da la posiziun dals cloms d'urgenza da tut las raits da telefonia (rait fixa, telefonin, VoIP) sur in'unica plattafurma. Gestiunarias e gestiunaris da telefonia mobila èn obligads tenor lescha d'eruir datas exactas da la posiziun en cas da cloms d'urgenza e da metter a disposiziun a las organisaziuns da cloms d'urgenza. La Polizia chantunala dal Grischun e la Centrala 144 èn ussa tecnicamain sin il stadi il pli nov e pon eruir las posiziuns dals cloms d'urgenza.
«La posiziun exacta d'ina persuna en urgenza u la posiziun d'in vehichel suenter in accident è ina da las pli impurtantas infurmaziuns per la polizia e per las forzas da salvament en cas d'in clom d'urgenza», di Hans Jürg Plattner dal center da datas da la Polizia chantunala dal Grischun. Per che las 55 centralas d'alarm svizras organisadas en moda decentrala possian acceder a las datas da la posiziun d'in clom d'urgenza fatg, ston las producentas ed ils producents garantir la funcziun da la localisaziun da l'apparat final. Advanced Mobile Location (AML) sto pia esser activà en il sistem operativ dals apparats. La fin finala vegnan dapli che 70 pertschient dals cloms d'urgenza fatgs cun telefonins. En cas da telefonats en Svizra als numers d'urgenza 117 (polizia), 118 (pumpiers), 144 (sanitad), 145 (clom d'urgenza d'intoxicaziun), 143 / 147 (agid da creschids ed agid d'uffants) e 112 (numer d'urgenza europeic) sco en cas da servetschs datiers da cloms d'urgenza 1414 (Rega) e 1415 (Air Glacier) vegn eruida automaticamain la posiziun. «Nus avain stuì adattar noss sistem da direcziun d'acziuns per pudair retschaiver ed elavurar las infurmaziuns», declera Plattner.
Clom d'urgenza automatic da vehichels
Il clom d'urgenza automatic da vehichels eCall 112 è gia dapi ils 31 da mars 2018 in'obligaziun en la UE ed en Svizra per novs tips admess d'autos da persunas. Il clom d'urgenza vegn activà u cun smatgar en moda manuala la tasta da SOS en il vehichel u en moda automatica tras ina collisiun ferma.
Servetsch gratuit
L'entira banca da datas dal clom d'urgenza è suttamessa a las pretensiuns da la protecziun svizra da datas e na va betg en ils mauns da persunas nunautorisadas. En Svizra na vegnan messas a quint naginas taxas per AML en cas d'in clom d'urgenza. Dapi il mars 2020 è il servetsch in'obligaziun per tuts smartphones vendids en il martgà europeic.