L'onn 2019 ha la Polizia chantunala dal Grischun introducì per l'emprima giada la plazza da lavur polivalenta. Quai signifitga che las collavuraturas ed ils collavuraturs pon utilisar lur plazza da lavur usitada er en moda mobila. Quests convertibles pon vegnir duvrads sco tablet, però er sco computer cun ina tastatura montada magneticamain. Il temp na stat dentant betg airi ed er la tecnologia è sa sviluppada vinavant.
En vista a questas midadas ha la Regenza dal chantun Grischun prendì la decisiun da cumprar novs apparats cun dapli prestaziun, e quai sur ils proxims tschintg onns per l'entira administraziun. Sin basa dal volumen d'incumbensas prognostitgà e da la Cunvegna interchantunala davart las acquisiziuns publicas è l'incumbensa per la furniziun da 3800 apparats mobils vegnida publitgada tras l'Uffizi d'informatica (UI) en ina procedura averta tenor GATT/WTO. Durant la collavuraziun tranter la partiziun Information and Communication Technology (ICT) da la Polizia chantunala dal Grischun ed il UI ha la ICT pudì far valair cun success sias pretensiuns. Quai è stada l'emprima publicaziun uffiziala dad IT da l'Uffizi d'informatica cun in agen criteri d'agiudicaziun per valitar la persistenza. En connex cun la persistenza èn vegnids resguardads aspects sco p.ex. la reparabladad, la minimalisaziun dal material duvrà, l'utilisaziun da materials reciclads u la reciclabladad. La collavuraziun sur il post da servetsch or è stada ordvart positiva.
Per cumparegliar ils differents models èn vegnids giuditgads ils custs, la persistenza e la qualitad. Resguardond questas pretensiuns è il model dal producent Dell sa mussà d'esser meglier ch'ils auters. Quest nov convertible ha differentas novas funcziuns che fan, ch'el è in accumpagnader ideal per la lavur poliziala quotidiana sco er per il diever intern. Sco ambient da lavur flexibel porscha il laptop cun in pli grond arcun da lavur ina reacziun pli svelta da las applicaziuns. Uschia po la productivitad vegnir augmentada anc ina giada. Cun ina tastatura fixa, cun in touchscreen da 14" e cun in arcun da lavur pli grond permetta il nov apparat da far in grond pass enavant, cumpareglià cun l'apparat vegl.
Deposit provisoric dals novs apparats