Ils 15 da november èn sa scuntrads ils cumandants dals corps da polizia dals chantuns Uri, Tessin e Grischun. Accumpagnads èn els mintgamai vegnids dals schefs da la Polizia da traffic. L'intent da l'inscunter che ha lieu mintga onn l'atun è stà il barat d'experientschas e d'infurmaziuns actualas da la polizia da traffic. Il colonel Walter Schlegel è vegnì accumpagnà dal maior Aluis Candinas al center da controlla per il traffic pesant Giornico/TI. Quel ha preschentà a las participantas ed als participants il dumber d'accidents da traffic registrads fin il di da referenza, ils 15 da november 2022, ed ha referì davart ils accents da la prevenziun d'accidents da moto da la Polizia chantunala dal Grischun.