La polizia chantunala dal Grischun e la Polizia da la citad da Cuira lantschan la primavaira 2024 in'acziun da prevenziun communabla «Tge vala per vehichels electrics da trend?» La campagna è vegnida preschentada ils 19 da mars 2024 a chaschun da la conferenza da medias davart la statistica dals accidents da traffic. 

Marcel Trinkler (Polizia chantunala dal Grischun) e Gian-Rico Keller (Polizia da la citad da Cuira) discuteschan il cumenzament da la campagna.

Bleras scolaras e blers scolars dovran sin lur via da scola ed en lur temp liber vehichels electrics da trend, saja quai in e-bike, in e-trotti, in e-scooter u auters. La polizia constatescha savens in cumportament sbaglià che resulta d'ina mancanza da savida. Perquai vegn uss infurmà davart las prescripziuns las pli impurtantas. Manadras e manaders da scola survegnan in fegl d'infurmaziun ed ina brev per ils geniturs per derasar las reglas e prescripziuns. En l'instrucziun da prevenziun che la polizia porscha a partir da la 1. classa primara fin a la 3. classa superiura survegnan ils uffants las infurmaziuns davart ils vehichels da trend d'emprim maun.