Las controllas da traffic èn in element central da la lavur poliziala. Durant ina chauda saira da zercladur ha la Polizia chantunala dal Grischun fatg – ensemen cun organisaziuns partenarias – ina controlla da pliras uras a Cuira.

Ils ins sin ina tura da far cumpras …
Cun l'entschatta dal traffic da la saira sontga ha cumenzà la controlla. Il focus è vegnì mess sin la capacitad da manischar da las manischunzas e dals manischunzs sco er sin il stadi tecnic dals vehichels. Bleras da las persunas controlladas eran sin via a chasa u en viadi per far cumissiuns – correspundentamain varià e maschadà è sa preschentà il champ da las persunas controlladas.

… ils auters en sortida
Cun la saira che s'avanza è il dumber da vehichels midads s'augmentà marcantamain. En cas d'in suspect da modificaziuns inadmissiblas u d’ina restricziun da la segirezza dal traffic han atgnas spezialistas ed agens spezialists ubain experts da l'Uffizi per il traffic sin via dal Grischun fatg in'examinaziun directa al lieu. En quest connex èn vegnids constatads repetidamain elements montabels betg controllads ed indrizs da sbuf midads u defects che han chaschunà grondas ramurs. Las persunas èn vegnidas chastiadas correspundentamain.

Per gronda part in bun attestat
La gronda part da las circa 80 manischunzas e manischunzs controllads ha cumprovà d‘ademplir las prescripziuns. La moda da discurrer al post da controlla è stada determinada, dentant per gronda part cun respect ed amicabla.
La controlla è vegnida sustegnida d'in medi uffizial, da la Polizia da la citad da Cuira e da la Procura publica dal Grischun.