Zum Seiteninhalt

Tabellas fiscalas

Rabat per vehichels a motor che chaschunan paucas emissiuns

Dapi il 1. da schaner 2009 survegnan vehichels a motor che chaschunan paucas emissiuns in rabat da 60 pertschient u schizunt dad 80 pertschient sin las taglias da traffic en il Grischun. Las premissas che ston vegnir ademplidas èn enumeradas qua:

Resguardai per plaschair che la reducziun sin la taglia da traffic vegn concedida automaticamain, sche nus enconuschain las valurs d'emissiun.

Extract da l'ordinaziun da la regenza tar la lescha introductiva tar la lescha federala davart il traffic sin via (ORtLItLTV):

Art. 15

1. La taglia da traffic vegn reducida:

a) per 60 pertschient per vehichels a motor levs cun ina svapur maximala da CO2 da 110 g/km;
b) per 80 pertschient per vehichels a motor levs cun ina svapur maximala da CO2 da 95 g/km;
c) per 80 pertschient per vehichels a motor grevs da la classa EURO la pli severa ch'è mintgamai da survegnir sin il martgà svizzer.

2. Ultra da quai na dastga la svapur da pulvra fina betg surpassar 0,01 g/km tar vehichels a motor levs tenor l'alinea 1 cun motors da diesel.

3. La possessura u il possessur sto cumprovar, tge criteri da reducziun che ses vehichel ademplescha. Il medem vala per vehichels omologads cun differentas sorts da mecanissem.

4. La regenza reducescha mintga 2 onns las limitas per la svapur da CO2, l'emprima giada per il 1. da schaner 2011.

5. Il dretg da reducziun da la taglia da traffic cumenza e finescha tenor las reglas da l'artitgel 13 confurm al senn.