Zum Seiteninhalt

Cataster da las RPDP

Tge è il cataster da las RPDP?

-

Tgi che posseda terren en Svizra na po betg utilisar quel sco ch'el vul. I vala d'observar cundiziuns generalas sco per exempel lingias da distanza u restricziuns da canera, ch'èn resultadas sin fundament da decisiuns dal legislatur u da las autoritads. Questas uschenumnadas restricziuns da la proprietad da dretg public (RPDP) èn liantas per proprietarias e proprietaris da bains immobigliars.

En Svizra datti passa 150 differentas RPDP. La confederaziun ha decidì d'acceptar ad interim las suandantas restricziuns da la proprietad en il cataster: 

  • planisaziun d'utilisaziun

  • vias naziunalas

  • viafiers

  • eroports

  • lieus contaminads

  • protecziun da l'aua sutterrana

  • canera

  • guaud 

En il Grischun na vegnan per entant betg acceptadas ulteriuras restricziuns da la proprietad.

Cun il cataster da las RPDP ch'è en elavuraziun daventan facilmain accessiblas las infurmaziuns relevantas davart ils bains immobigliars. Ultra da quai vegn augmentada la segirezza giuridica grazia ad infurmaziuns liantas. Da quai profitan tant las proprietarias ed ils proprietaris da bains immobigliars sco er ils differents acturs dal martgà d'immobiglias, las autoritads e las administraziuns publicas. 

Broschüre ÖREB-Kataster 

Elavuraziun dal cataster da las RPDP en il chantun Grischun

Suenter che otg chantuns da pilot han elavurà il cataster da las RPDP dal tuttafatg u per part, pretenda la confederaziun che quai duaja capitar fin la fin da l'onn 2019 er en ils ulteriurs chantuns. La regenza grischuna ha incumbensà l'uffizi d'agricultura e da geoinfurmaziun da manar il project. La direcziun dal project sa cumpona da represchentants dals posts da servetsch participads e dal departament d'economia publica e fatgs socials. Il directur dal project è il geometer chantunal Hans Andrea Veraguth.

 

-

 

Lavurs terminadas (fin la fin 2019)

Gia terminà ed approvà da la confederaziun è il concept da realisaziun. Ultra da quai èn vegnids reglads en ina cunvegna da program cun la confederaziun ils pass dal project e la finanziaziun cuminaivla.

Lavurs currentas (fin la fin 2019)

Fin la fin da l'onn 2019 duai l'infrastructura per il manaschi dal cataster RDPP esser pronta. La registraziun digitala da las datas dal svilup dal territori e da la protecziun da las auas è er curt avant la terminaziun. Ussa vali da rediger las directivas davart l'emprima registraziun da las datas en il cataster RDPP sco er per lur actualisaziun e da far tests cun talas en vischnancas da pilot.

Lavurs che ston anc vegnir fatgas (a partir da 2020)

Per il cumenzament da l'onn 2020 vegn il cataster RDPP mess en funcziun. Alura vegnan ulteriuras unitads da datas registradas en il cataster e las funcziuns vegnan meglieradas ed extendidas.