Cuntegn da la pagina

Dretg funsil e fittanza

Procedura da permissiun en il dretg funsil puril

L'autoritad da permissiun per la fatschenta da dretg funsil puril è l'Inspecturat dal register funsil e register da commerzi (IRFRC), Rohanstrasse 5, 7001 Cuira. Ils documents da dumonda necessaris, ils formulars, las explicaziuns e las leschas pudais Vus retrair tar il IRFRC u chargiar giu da sia adressa.

En il decurs da la procedura da consultaziun po il IRFRC dumandar il cunrapport specific da l'Uffizi d'agricultura e da geoinfurmaziun (UAG).

Dar a fittanza manaschis agriculs e bains immobigliars agriculs

Il dar a fittanza manaschis e bains immobigliars agriculs è reglà en leschas ed en ordinaziuns spezialas. Exceptads da questa regulaziun èn mo vignas da main che 15 aras ed auters bains immobigliars agriculs senza edifizis da main che 25 aras. L'emprima fittanza dura per manaschis almain 9 onns e per singuls bains immobigliars almain 6 onns. Per permetter ina durada pli curta è cumpetent il UAG.

La calculaziun dal tschains da fittanza è reglada en l'Ordinaziun federala davart la calculaziun dal tschains agricul (CS 221.213.221). Stimaziuns dal tschains da fittanza vegnan purschidas dal servetsch da cussegliaziun agricula sco er da la cumissiun da stimaziun da l'uniun purila svizra a Brugg.