Navigaziun principala

Cuntegn da la pagina

Alpegiada

Cun las contribuziuns d'alpegiada vegn indemnisada la tgira e l'utilisaziun da pastgiras che na pon betg vegnir cumpigliadas en ils pajaments directs generals.

Il territori d'alpegiar è vegnì cunfinà ils onns 1999 e 2000 tenor las disposiziuns da l'Ordinaziun davart il cataster da producziun agricula e la zavrada da zonas (CS 912.1) visavi la surfatscha utilisada da l'agricultura en il senn pli stretg.

Per cuntrafar ad in impuls d'intensivar na vegnan las contribuziuns betg calculadas tenor il dumber dals animals alpegiads, mabain pajadas tenor in dumber d'animals normal che sa basa sin l'alpegiada dals onns 1996 fin 1998. Cun quai duai vegnir mantegnida la cultivaziun necessaria per la tgira er, sch'il dumber d'animals sa diminuescha causa ch'ils effectivs da muvel regredeschan. Las pastgiras d'alpegiada e communablas ston vegnir cultivadas adequatamain ed ecologicamain. Correspundentamain a questa finamira èn fixadas las pretensiuns da cultivaziun. Las surfatschas che na vegnan betg pasculadas en l'interess da l'ecologia ston vegnir protegidas cun mesiras adattadas da las chalzeradas e da las ruissas dal muvel. Las surfatschas cun plantas sensiblas e cun ina vegetaziun primara sco er ils territoris cun privel d'erosiun sa chattan surtut en regiuns autas che vegnan utilisadas savens sco alps da nursas. Per alps da nursas existan perquai cundiziuns spezialas areguard la pasculaziun ed il dumber d'animals maximal per ha pastgira.

Formulars / Instrucziuns

Documents