Navigaziun principala

Cuntegn da la pagina

Annunzia e dumonda

Tgi che vul retrair pajaments directs, sto annunziar quai fin ils 31 d'avust da l'onn precedent (art. 97 da l'Ordinaziun davart ils pajaments directs a l'agricultura, OPD; CS 910.13). L'annunzia cumpiglia la cumprova da prestaziun ecologica (CPE) e tut ils geners da pajaments directs giavischads, tranter quels particularmain las contribuziuns per sistems da producziun PLCP, Bio, STB/SORTA e producziun extensiva. Questa annunzia è necessaria, per che las controllas possian vegnir coordinadas. Per manaschis existents vegn fatga l'annunzia sur l'Agriportal.

Manaschis novs pon vegnir annunziads cun il formular "Annunziar in nov manaschi agricul". En la renconuschientscha dal manaschi fixescha l'Uffizi d'agricultura, sch'in nov manaschi ha il dretg da survegnir pajaments directs (art. 29a da l'Ordinaziun davart la terminologia agricula e la renconuschientscha da furmas da manaschi, OTerm; CS 910.91). Ensemen cun l'annunzia dal nov manaschi agricul po l'annunzia per ils pajaments directs vegnir inoltrada sin in formular da palpiri.

Ils pajaments directs vegnan pajads mo sin dumonda. Questa dumonda fan las cultivaturas ed ils cultivaturs da manaschis da l'entir onn a chaschun da l'enquista da structura il schaner/favrer da l'onn da contribuziun (art. 98 OPD). Sch'i sa mussa pli tard, che indicaziuns ston vegnir midadas, è la cultivatura u il cultivatur obligà d'annunziar quai avant che adattar la cultivaziun (art. 100 =PD).

La dumonda per contribuziuns en il territori d'alpegiada sto vegnir inoltrada tranter il 1. ed ils 31 d'avust. Las dumondas vegnan inoltradas sur las vischnancas a l'Uffizi d'agricultura e da geoinfurmaziun.