Navigation

Inhaltsbereich

Plantas problematicas èn plantas che n'èn betg giavischadas tut tenor lieu e caracteristica u frequenza sin surfatschas utilisadas da l'agricultura per motivs ecologics, da la sanadad u economics. Latiers tutgan tant spezias indigenas (plantas problematicas) sco er exoticas (neofitas invasivas).

Tenor l'Ordinaziun davart la terminologia agricula po ina populaziun excessiva da plantas problematicas chaschunar l'exclusiun da la surfatscha utilisada da l'agricultura ed uschia er l'exclusiun dals pajaments directs (art. 16 al. 1 lit. b da l'Ordinaziun davart la terminologia agricula e la renconuschientscha da furmas da manaschi, OTerm; CS 910.91). Plantas problematicas incl. neofitas invasivas ston vegnir cumbattidas, particularmain ston ins impedir lur ulteriura derasaziun (art. 58 al. 3 da l'Ordinaziun davart ils pajaments directs a l'agricultura).

Claffa: segar anticipadamain ina planta problematica indigena 

La claffa sa derasa fermamain sin prads che vegnan tratgs a niz tard. Quai ha consequenzas negativas per la ritgezza da las spezias, per la qualitad dal pavel e per la racolta. La claffa è ina planta annuala. Per sa far valair sin in prà sto ses sem madirar en intervals regulars. Sch'ils prads vegnan segads a temp al cumenzament da la fluriziun, po la claffa vegnir chatschada enavos efficaziamain.

La pussaivladad da segar anticipadamain permetta da regular la claffa er en surfatschas da promoziun da la biodiversitad (prads pauc intensivs ed extensivs). La premissa è quella ch'il cultivatur annunzia questas surfatschas a temp (il pli tard 3 emnas avant che segar). In'unitad da cultivaziun dastga vegnir annunziada duas giadas entaifer 8 onns. L'unitad da cultivaziun na dastga betg vegnir dividida en surfatschas parzialas che duain vegnir segadas anticipadamain durant differents onns.

Neofitas invasivas 

I reussescha mo da las cumbatter, sche tuts sa participeschan. Nus As supplitgain perquai d'annunziar al UAG, sche Vus constatais neofitas invasivas entaifer la surfatscha utilisada da l'agricultura cun il formular d'annunzia sut. Qua tras survegnis Vus in termin per cumbatter la planta e sche necessari ina permissiun per segar a temp sin surfatschas da promoziun da la biodiversitad. L'Uffizi per la natira e l'ambient As porscha sin giavisch in accumpagnament professiunal.

Rigera alva: retegnair la multiplicaziun massiva cun strair ora 

Ils ultims trais onns han ins chattà adina dapli prads e pastgiras cun grondas populaziuns da la rigera alva annuala en il chantun Grischun. La derasaziun na duess betg cuntinuar, perquai che betg mo surfatschas da la protecziun da la natira sco er prads e pastgiras dals stgalims da qualitad I e II perdan lur qualitad, mabain perquai ch'er la racolta da pavel sa reducescha. Da princip vali da strair ora gia singulas plantas che cumparan. In purtret da la planta sco er mesiras da cumbat pussaivlas chattais Vus sutvart sut ils links.