Cuntegn da la pagina

Pajaments directs

Il sistem da pajaments directs ch'è vegnì sviluppà ulteriuramain drizza ils pajaments directs tenor las finamiras da la Constituziun federala. Ils elements centrals dal sistem da pajaments directs AP 2014–2017 èn: 
  • contribuziuns a la cuntrada cultivada per tegnair liber la cuntrada cultivada
  • contribuziuns a favur d'in provediment segir per mantegnair in provediment segir da la populaziun cun victualias
  • contribuziuns a la biodiversitad per mantegnair e per promover la varietad da las spezias
  • contribuziuns a favur da la qualitad da la cuntrada per mantegnair, per promover e per sviluppar vi-navant cuntradas cultivadas variadas
  • contribuziuns a sistems da producziun per promover en spezial furmas da producziun natiralas, ecologicas e favuraivlas als animals (per exempel bio e producziun integrada)
Ils 5 instruments permanents dals pajaments directs vegnan cumplettads cun 2 instruments da contribuziun limitads temporarmain:
  • contribuziuns a la gestiun effizienta da las resursas per meglierar l'utilisaziun persistenta da las re-sursas natiralas
  • contribuziuns transitoricas per garantir in svilup socialmain supportabel

Las contribuziuns actualas a favur dals animals vegnan transferidas per gronda part en las contribuziuns a favur d'in provediment segir. Las contribuziuns a favur d'in provediment segir vegnan pajadas en relaziun cun la surfatscha. Sin ils prads vegni premess da tegnair animals da niz che maglian pavel sitg (populaziun minimala). Sco premissa per il pajament da pajaments directs vala vinavant l'Observaziun da la cumprova da prestaziun ecologica (CPE).

Indicaziuns detagliadas davart las premissas sco er davart l'autezza da las contribuziuns chattais Vus sin la pagina d'internet da la Confederaziun sco er en differents documents da survista (vesair ils links qua sutvart).