Navigaziun principala

Cuntegn da la pagina

Construcziun auta agricula

Tras las meglieraziuns da structura en il sectur da la construcziun auta agricula ans engaschain nus per la meglieraziun da las cundiziuns da viver e da las relaziuns economicas da las famiglias purilas. Ellas survegnan structuras da manaschi adequatas e pon reagir pli svelt e meglier sin las midadas dal martgà. I vegnan pajadas contribuziuns betg rembursablas per construir u per renovar edifizis d'economia per animals che maglian pavel setg sco er per construir u per renovar edifizis communabels sco alps e chascharias. L'autezza da las tariffas da contribuziun variescha tut tenor la zona e la mesira da construcziun.

Tar la construcziun auta agricula elavurain nus circa 35 dumondas da contribuziun per onn, tut tenor ils credits che ans stattan a disposiziun. Nus infurmain las puras ed ils purs davart la procedura da project ed als cussegliain en dumondas da la tecnica da construcziun. Ultra da quai examinain e giuditgain nus projects da construcziun auta ed inoltrain la dumonda da conceder contribuziuns al departament cumpetent ed a l'Uffizi federal d'agricultura.

Per survegnir subvenziuns da la construcziun auta agricula ston vegnir observadas las prescripziuns da la legislaziun davart la protecziun da la natira, da la patria, da l'ambient e da las auas sco er da la planisaziun dal territori, da la protecziun dals animals e da la prevenziun d'accidents.