Cuntegn da la pagina

Meglieraziuns

L'instrument multifuncziunal

Meglieraziuns èn mesiras per mantegnair e per promover il territori rural. Questas mesiras cumpiglian

  • meglierar las cundiziuns da producziun e la basa da l'agricultura,
  • meglierar las relaziuns da viver e las relaziuns economicas e 
  • realisar ils giavischs da l'ecologia e da la planisaziun dal territori.

Per cuntanscher las finamiras servan mesiras singulas, projects communabels sco er megliaraziuns e projects cumplessivs communals u intercommunals e cumpletteschan uschia en moda ideala la nova politica regiunala. Els èn l'instrument da furmaziun e da realisaziun il pli cumplessiv en il territori rural.

En il servetsch da l'agricultura, da la natira, da la cuntrada e da la communitad

Meglieraziuns vegnan fatgas tar nus dapi la fin dal 19avel tschientaner. Gia adina han ellas gì l'intent da realisar las finamiras da la politica agrara. Oriundamain duevan ellas facilitar la lavur agricula sco er gidar a gudagnar ed a mantegnair cultira per garantir ch'il provediment cun victualias saja suffizient.

Ultra da la facilitaziun da la cultivaziun gidan las meglieraziuns modernas oz er a mantegnair ed a proteger la cultira, la cuntrada cultivada, las auas ed il maletg da la cuntrada. Las meglieraziuns stattan pia er considerablamain en il servetsch da la natira e da la cuntrada.

En il rom d'arrundaziuns dal terren datti la pussaivladad da cuvrir in basegn da terren cumprovà da la communitad tras ina deducziun generala. Uschia poi vegnir evità che mo singulas persunas ston metter a disposiziun ina quantitad da terren exagerada.

Situaziun actuala

Actualmain han 28 meglieraziuns generalas e 29 projects sco mesiras communablas il consentiment da la Confederaziun e dal Chantun. Differentas meglieraziuns generalas e cunzunt renovaziuns da raits veglias da vias champestras èn en preparaziun. Mintga onn vegnan exequidas lavurs per custs totals da var 27 milliuns francs. Da quests custs pajan la confederaziun var 11 milliuns francs ed il chantun var 8,4 milliuns francs, e quai en furma da contribuziuns betg rembursablas. Sco instituziuns responsablas vegnan mintgamai en funcziun las vischnancas da staziunament u las associaziuns.