Zum Seiteninhalt

Resumaziun

Il UAG cuntegna las partiziuns mesiras agriculas, meglieraziun da structura e mesiraziun sco er la partiziun da la geoinformatica ed il center da cumpetenzas dal SIG. Il champ d'incumbensa è fitg multifar e cuntegna las suandantas prestaziuns da servetsch:

Partiziun mesiras agriculas

La partiziun mersiras agriculas è responsabla per l'execuziun da la legislaziun federala e chantunala davart l'agricultura e procura per cundiziuns da basa favuraivlas per manaschis purils orientads al futur. En quest connex predominescha la producziun ecologica da vivonda d'emprima qualitad, il mantegniment da nossa basa da viver natirala e la tgira da la cuntrada cultivada. Il team da la partiziun mesiras agriculas elavura mintg'onn en collavuraziun cun las 207 vischnancas indicaziuns detagliadas davart ils manaschis agriculs ed ils manaschis d'alpegida (alps). Questas datas èn la basa per sviluppar vinavant la politica agrara, per las statisticas sco er per differentascalculaziuns da contribuziuns.

L'activitad principala da la partiziun mesiras agriculas è da reglar las contribuziuns federalas e chantunalas. Sa fidar è bun, però controllar è tuttina necessari! Cun controlladras e controlladers scolads aposta maina la partiziun in servetsch da controlla accredità da la confederaziun.

Il progress ha tradiziun en l'agricultura dal chantun Grischun. Ideas novas vegnan examinadas, promovidas e sustegnidas finanzialmain, e las cundiziuns da basa politicas respectivas vegnan creadas. La cumpetenza professiunala agricula è medemamain dumandada tar la procedura da decisiun d'auters uffizis, cunzunt en ils secturs da la planisaziun dal territori e dal dretg funsil. A la partiziun è ultra da quai suttamessa l'execuziun da la protecziun da las auas en l'agricultura.

Partiziun mesiraziun

La partiziun mesiraziun surveglia e maina la mesiraziun uffiziala (MU) en il chantun. Quella vegn realisada principalmain da biros da mesiraziun privats (inschigner-geometer).

La mesiraziun uffiziala cuntegna l'elavuraziun, l'administraziun e la cumplettaziun dals cunfins da proprietad sco er las infurmaziuns areguard il territori en connex cun cuvrida dal terren (edifizis, guaud, surfatschas cultivadas, traffic), ils objects singuls (mirs, punts, pendicularas e.u.v.) e la nomenclatura. 

Ella furnescha la basa geometrica per las prescripziuns davart l'indriz e l'administraziun dal register funsil federal e serva a segirar la proprietad funsila ed ils dretgs che stattan en colliaziun cun quella. Las datas da la MU furman ultra da quai la basa per installar e manar sistems d'infurmaziun geograficas (SIG).

Il UAG administrescha ultra da quai il plan da survista topografic 1:10'000, in model digital da l'autezza ed ils cunfins da las vischnancas e la partiziun dal plan da la mesiraziun uffiziala. Las ulteriuras datas legalas da la mesiraziun uffiziala vegnan administradas dal geometer-revisur cumpetent.

Partiziun meglieraziuns da structura

La partiziun meglieraziuns da structura cumpiglia ils secturs meglieraziuns, construcziuns autas agriculas, pendicularas e runals e la promoziun da la construcziun d'abitaziuns

Meglieraziuns

Las noziuns "meglieraziun" e "meglieraziun da structura" èn equivalentas. En cas da las meglieraziuns da structura differenziescha la confederaziun plinavant tranter "meglieraziuns dal terren" (arrundaziuns dal terren, averturas e.u.v.) ed "edifizis agriculs" (construcziuns autas agriculas).

En l'art. 1 da la lescha da meglieraziun dal chantun Grischun èn meglieraziuns numnadas sco mesiras, ovras e construcziuns agriculas autas e bassas che han l'intent da mantegnair u d'augmentar la productivitad dal terren, da facilitar sia cultivaziun u d'al proteger cunter devastaziuns u destrucziuns chaschunadas d'eveniments da la natira. L'ultim temp èn las valurs en la societad sa midadas fermamain ed uschia valan las meglieraziuns da structura modernas oz sco instruments per propi per in svilup persistent en il territori rural. Uschia vegn tegnì quint en il rom da las meglieraziuns da structura – ultra dals interess da l'agricultura – pli e pli er dals basegns da la natira e da l'ambient, cunzunt dal mantegniment d'ina cuntrada natirala e da la varietad da las spezias. Sco mesira la pli effizienta è anc adina sa cumprovada la meglieraziun generala. Ella cuntegna la arrundaziun dal terren e la construcziun da stabiliments d'avertura cunvegnents en in territori cumpiglià pli grond. Dasperas datti adina puspè meglieraziuns singulas che duain purtar ina meglieraziun – per ordinari averturas – ad in circul d'utilisadras e d'utilisaders limità. En il chantun Grischun èn instradads actualmain bain blers projects da meglieraziun che vegnan manads ed accumpagnads da las collavuraturas e dals collavuraturs da la partiziun meglieraziun da structura. L'elavuraziun dals projects per propi vegn fatga da biros d'inschigners privats.

Construcziun auta agricula

En il rom da las meglieraziuns da structura elavura il ressort "construcziuns autas" las dumondas da conceder contribuziuns a stallas ed ad edifizis agriculs communabels. En quest connex vegnan pajadas contribuziuns betg rembursablas ad edifizis novs, ad engrondiments ed a sanaziuns d'edifizis. Questas contribuziuns permettan ina gestiun raziunala dal manaschi e pussibiliteschan da tegnair animals che maglian pavel setg en stallas adequatas. Cun engrondir e cun sanar edifizis d'alp sco er edifizis regiunals communabels, sco chascharias, pon quests edifizis e quests stabiliments vegnir equipads cun la tecnica da producziun la pli nova.

Tras la nova orientaziun da la politica agrara 2011 pon vegnir subvenziunads projects per il svilup regiunal. Quests projects ston avair ina participaziun per gronda part agricula.

Perquai ch'igl ha actualmain relativamain bleras dumondas da contribuziun, ston ins far quint cun in temp da spetga da 2 fin 3 onns.

Projects per il svilup regiunal (PSR)

Dapi il 1. da schaner 2007 pon PSR, che han l'intent da promover products indigens e regiunals, vegnir sustegnids cun contribuziuns, premess che l'agricultura saja participada per gronda part. En il center stat la creaziun da valurs en l'agricultura.

Projects da success vegnan iniziads tras acturs al lieu e vegnan purtads er tras ina instituziun responsabla locala. La cooperaziun activa è in element impurtant d'in process participativ. La rait d'acturs locals è la basa per activitads economicas raziunalas e duraivlas en il territori rural. Ils princips cumprovads, numnadamain il princip da «bottom up» (impuls tras instituziuns responsablas localas) ed il princip da la cofinanziaziun (participaziun da la confederaziun e dal chantun, custs restants cuvrids tras l'instituziun responsabla), vegnan perquai applitgads er tar PSR. Las persunas pertutgadas directamain (purs) ston vegnir integradas en moda adequata en l'instituziun responsabla locala.

Per ch'ils purs possian realisar l'idea d'in project, ston els vegnir cussegliads ed accumpagnads en moda cumplessiva en la fasa iniziala, saja quai tras in manader da project u tras in coach. Ils custs che resultan vegnan finanziads tras l'uffizi federal d'agricultura (UFAG).

Il chantun, vul dir la partiziun PSR dal UAG, accumpogna ils projects, sustegna ils svilups da la lavur da project, maina las tractativas davart las contribuziuns imputablas da la confederaziun e dal chantun e dat las permissiuns.

Runals e pendicularas

Al departament chantunal d'economia publica e fatgs socials cumpeta la surveglianza da las pendicularas e dals runals. El è cumpetent per la concessiun, la midada u renovaziun sco er per la revocaziun da permissiuns per construir e manar tals stabiliments.

L'Uffizi d'agricultura e da geoinfurmaziun è l'instanza da controlla tecnica. El coordinescha la procedura da permissiun e procura per ina realisaziun speditiva.

Il Uffizi d'agricultura e da geoinfurmaziun è dentant er post da controlla e d'annunzia per impediments per il traffic aviatic (edifizis, implants da cranas, lingias d'auta tensiun, stabiliments da cabels e da filfiers) che pon periclitar aviuns u impedir il manaschi da stabiliments da controlla dal traffic aviatic.

Promoziun da la construcziun d'abitaziuns

Meglieraziun da las relaziuns d'abitar en il territori da muntogna

Il ressort "construcziuns autas" elavura las dumondas da conceder contribuziuns a la meglieraziun da las relaziuns d'abitar da la populaziun muntagnarda. I vegnan pajadas contribuziuns betg rembursablas a la sanaziun d'edifizis, ad edifizis novs sco er a la cumpra da chasas d'abitar e d'abitaziuns en il territori da muntogna. Observond tschertas cundiziuns, po vegnir sustegnida tant la populaziun agricula sco er la populaziun betg agricula. Pir grazia a questas subvenziuns pon bleras persunas sanar lur abitaziun u lur chasa.

Promoziun da la construcziun d'abitaziuns e da la proprietad

Il UAG è - en collavuraziun cun l'uffizi federal per l'abitar - cumpetent per la promoziun da la construcziun d'abitaziuns e da la proprietad

Ils 31 da december 2001 è vegnida sistida la promoziun da la construcziun d'abitaziuns tenor la lescha federala davart la promoziun da la construcziun d'abitaziuns e da la proprietad (LCAP). Quai n'ha dentant nagina influenza sin ils agids ch'èn vegnids garantids avant, uschia che quels vegnan terminads tenor la basa legala ch'era valaivla da quel temp.

Il 1. d'october 2003 è entrada en vigur la nova lescha federala per promover las abitaziuns a pretsch moderà (lescha per promover las abitaziuns, LPrA) dals 21 da mars 2003.

Sa basond sin la LPrA po la confederaziun promover la construcziun u la renovaziun d'abitaziuns da locaziun per chasadas cun pitschnas entradas, l'access a proprietad d'abitar, las activitads da las organisaziuns da construcziun d'abitaziuns d'utilitad publica sco er la perscrutaziun en il sectur d'abitar.

Per la promoziun èn previs agids directs ed indirects. Ils emprests da daners da la confederaziun èn dentant - en il rom dal "program da distgargia per las finanzas federalas 2003" - vegnids sistids fin la fin da l'onn 2008. La promoziun sa restrenscha uschia per il mument al sustegn indirect.

Geoinformaziun

L'administraziun chantunala dal Grischun dispona da numerusas geodatas e chartas. Geodatas èn datas specificas cun connex geografic (p.ex. datas davart lais e flums). La geodatas vegnan registradas ed administradas en il sistem d'infurmaziun geografica dal Grischun (SIG–GR). En l'inventari da las datas èn registradas infurmazius curtas davart las unitads da las datas existentas.