En il rom da la Strategia da digitalisaziun dal chantun Grischun ha l'Uffizi d'agricultura e da geoinfurmaziun gia digitalisà differents process da formulars. Da nov pudais Vus inoltrar dumondas ed annunzias sin via electronica sur il ePortal chantunal. Quai simplifitgescha ils andaments administrativs e meglierescha la transparenza dals singuls pass dal process. Ils process da formulars vegnan digitalisads pass per pass. Ulteriurs formulars e process vegnan digitalisads cuntinuadamain. Ils links al ePortal chattais Vus sin la pagina d'internet www.alg.gr.ch tar ils champs tematics respectivs.
Qualitad da la cuntrada (QC)
Las contribuziuns QC sustegnan mesiras che creeschan ina plivalur per la cuntrada cultivada. Quai èn d'ina vart contribuziuns unicas, p. ex. per construir novs elements da la cuntrada, sco bigls da lain u saivs tradiziunalas, per far sanaziuns sin surfatschas difficilas da cultivar u per plantar pumers cun bist aut. Da l'autra vart vegnan promovidas er lavurs da tgira, p. ex. da saivs vivas e d'urs da guauds, u l'allontanament da chaglias sin surfatschas creschidas en. Dapi il cumenzament dals projects QC annunzian las persunas participadas cun in formular, che questas mesiras vegnian realisadas e/u sajan terminadas. Da nov vegn quai annunzià sin via electronica sur il ePortal chantunal.
Cumpareglià cun la procedura sin palpiri n'è il proceder betg sa midà. Las petentas ed ils petents empleneschan la dumonda online e la cumpletteschan cun las indicaziuns necessarias. Er per mesiras forestalas succeda l'integraziun da las selviculturas e dals selviculturs da revier cumpetents da nov en moda digitala. L'entir process d'annunzia ha pia lieu cumplainamain sin via electronica. La premissa per l'annunzia è, che las mesiras sajan vegnidas registradas ordavant en il rom d'ina cussegliaziun tras ils biros ecologics regiunals. Ils formulars chattais Vus en il ePortal en il sectur «Natira ed ambient».
Ulteriuras dumondas
Dumondas per adattar la surfatscha utilisada da l'agricultura vegnan inoltradas da nov sur in formular electronic. L'anteriur formular sin palpiri croda pia davent. Areguard il cuntegn dal formular ed areguard il proceder na datti naginas midadas. Il formular è disponibel en il ePortal en il sectur «Natira ed ambient».
Er dumondas per midar l'utilisaziun e per parcellar bains d'arrundaziun vegnan inoltradas da nov sin via digitala. Er qua na datti naginas midadas vi dal formular e vi da la procedura. Il formular è da chattar en il sectur «Construcziun ed immobiglias».
Link al ePortal: ePortal chantun Grischun
Las persunas da contact cumpetentas èn inditgadas directamain tar il formular online respectiv u sin alg.gr.ch sut «Sur da nus > Persunas da contact».
Extract dal formular QC per annunziar mesiras forestalas