En il decurs da la stad avain nus dastgà beneventar quatter novas collavuraturas e novs collavuraturs; l'atun ha ultra da quai gì lieu in spustament intern d'ina plazza. Nossas novas collegas e noss novs collegas èn arrivads tar nus cun experientschas multifaras, ideas frestgas ed in know-how prezius – in vair enritgiment per noss post da servetsch.

Gugent preschentain nus las novas collavuraturas ed ils novs collavuraturs:

Laura Schmid, dapi il fanadur 2025
Sco architecta diplomada cumplettescha Laura noss team interdisciplinar sco planisadra cirquitala e porta cumpetenzas professiunalas preziusas. Actualmain n'è ella anc betg attribuida ad in circul fix. Ella sustegna tut ils trais teams tar l'elavuraziun da dumondas da construcziun ordaifer las zonas da construcziun. Bainbaud vegn ella plinavant ad esser integrada en l'examinaziun preliminara ed en l'approvaziun da las planisaziuns localas.

Laura: «Pli baud hai jau, sco architecta, planisà projects da construcziun. Pli tard hai jau accumpagnà ils projects sco inspectura da construcziun en la procedura per la permissiun da construcziun. Ussa ma legrel jau da tgirar, sco planisadra cirquitala, dumondas EOZ e da dastgar cooperar al svilup dal territori.»

Sarah Mark, dapi il fanadur 2025
Durant ses studi da geografia sustegna Sarah nossa administraziun en differents secturs. Sco vaira maistra dals scans digitalisescha ella noss dossiers e procura uschia per in'archivaziun effizienta e conscienziusa.

Sarah: «Cunquai che jau studegel «planisaziun dal territori» sco rom secundar, ma legrel jau fitg da la pussaivladad da gia pudair applitgar in pau mes studi en il job accessoric. Jau ma sent fitg bain qua tar il UST e gid gugent dapertut là, nua che jau poss.»

Joachim Boss, dapi l'avust 2025
Joachim ha gia ina buna chapientscha dals andaments administrativs. Sco assistent d'administraziun sustegna el il team dal UST en tut las dumondas administrativas e procura, che las proceduras davos las culissas han lieu senza disturbis.

Joachim: «Suenter blers onns a Turitg e conturns sun jau puspè turnà en las muntognas. Jau ma legrel d'applitgar mias enconuschientschas tar il UST.»

Rainer Krättli, dapi l'avust 2025
Rainer è noss nov manader dals servetschs administrativs. Cun sias vastas experientschas professiunalas – tranter auter grazia a ses «executive master of business administration» – surpiglia el questa rolla centrala e rinforza duraivlamain noss process administrativs.

Rainer: «Sco generalist cun in vast satgados da differentas situaziuns professiunalas e da scolaziun ma legrel jau sin in champ d'incumbensas multifar en in team engaschà. Jau elavur gugent soluziuns constructivas che cumpiglian pliras funcziuns e partiziuns, er entaifer process e projects interdisciplinars.»


Nadine Deflorin, dapi l'october 2025
Nadine, ch'è stada manadra dals servetschs administrativs, ha midà internamain en la funcziun da spezialista per l'applicaziun eBau. Questa nova funcziun rinforza la plattafurma eBau e la collavuraziun cun vischnancas, petentas e petents sco er cun auters posts da servetsch. Nadine è gia stada involvida decisivamain en il project per l'introducziun da la procedura electronica per la permissiun da construcziun. Grazia a sias enconuschientschas fundadas da la procedura per la permissiun da construcziun e grazia a sia cooperaziun tar l'installaziun da la plattafurma eBau ha ella premissas idealas per sia nova incumbensa. La midada ha gì lieu sin ses agen giavisch.

Nadine: «Jau ma legrel fitg da dastgar participar activamain a la concepziun da la digitalisaziun en il chantun Grischun. Per mai èsi ina motivaziun d'accumpagnar las vischnancas sin lur via vers l'execuziun digitala e da stgaffir cuminaivlamain soluziuns pratitgablas e prospectivas.»