En il rom d'in «model d'artg» remetta noss manader d'uffizi d'enfin ussa Richard Atzmüller suenter stgars 15 onns sia funcziun directiva. El lavura vinavant sco spezialist en il sectur Basas tar l'Uffizi per il svilup dal territori ed apporta activamain sia savida e sia experientscha.

Linus Wild ha surpiglià per il 1. d'avrigl 2026 la direcziun da l'uffizi. El lavura dapi blers onns tar il UST ed enconuscha fitg bain las incumbensas e las sfidas da la planisaziun dal territori en il chantun Grischun. Dapi il 2022 è el stà vicemanader da l'uffizi e manader da la partiziun «Planisaziun d'utilisaziun ed EOZ». Cun sia experientscha da plirs onns e cun sia vasta savida spezialisada ha el las meglras premissas per concepir activamain l'ulteriur svilup dal UST.

La midada en la direcziun chaschuna ulteriuras roschadas internas: Beat Sonder, dapi passa 10 onns tar il UST e fin ussa manader dal circul Sid, daventa da nov il manader da la partiziun «Planisaziun d'utilisaziun ed EOZ». Adrian Cadosch è vegnì tschernì sco manader dal circul Nord. Tuts dus han ina vasta experientscha e vegnan ad ademplir lur novas incumbensas en moda cumpetenta ed engaschada.

Antonio Tierno rinforza noss servetsch giuridic. Dapi il november sustegna el ils planisaders cirquitals dal circul Sid en las proceduras per la permissiun da construcziun ordaifer la zona da construcziun e po far diever intenziunadamain da sias enconuschientschas linguisticas. Nus ans legrain da la collavuraziun cun el ed al giavischain in bun cumenzament, bun success e bler plaschair en sia nova rolla.

Walter Peng va en pensiun suenter stgars 34 onns da servetsch. Durant quest temp ha el elavurà en moda decisiva las basas concernent il territori. Walter Peng ha contribuì en moda centrala, ch'ils interess territorials dal Grischun èn vegnids integrads en las posiziuns da la Regenza tar nundumbraivlas planisaziuns federalas. Nus engraziain a Walter per ses engaschament da plirs onns sco «lavurunz fidà e nunspectacular» e per ses caracter equilibrà cun in bun umor.
Walter, a tai giavischain nus tut il bun per la nova fasa da la vita!